Hitzordu hirukoitzarekin dator Mater aste honetarako
Ostegunean lonja bisitatuko dute; larunbatean Jaizkibelgo itsaslabarrak bisitatuko dituzte Mater ontzian; eta igandean itsas hondakinak arrantzatuko dituzte Mater ontzian.
Mater Museo Ekoaktiboak hiru jarduera antolatu ditu aste honetarako. Lehena ostegunean izango da, hilak 9, eta arrain lonja bertatik bertara ezagutzeko aukera izango dute parte hartzaileek. Jarduera horretan, arrainak zer bide egiten duten ezagutuko dute partaideek, arrantzaleek lonjara eramaten dutenetik arrandegira iristen den arte. Horrez gain, arrain enkantea ikusi eta lonjaren egunerokoan dagoen jarduera biziaren lekuko izango dira parte hartzaileak. Bisita 05:50etik 07:20era izango da, eta 13 euroko prezioa du.
Bigarren jarduera larunbatean egingo da, hilak 11, eta Jaizkibelgo itsaslabarrak bisitatuko dira Mater ontzian nabigatuz. Bisita 12:00etatik 13:30era izango da, eta 30 euroko kostua izango du. 12 urtetik beherakoek, aldiz, 15 euro ordaindu beharko dituzte.
Igandean, hilak 12, egingo da Materrek aste honetarako ondu duen azken jarduera: Itsas hondakinen arrantza. Parte hartzaileak itsas ingurunearen kontserbazio aktiboan arituko dira Mater ontzian. Azken jarduera 10:00etatik 13:00etara izango da, doan.
Jarduerak 619 81 42 25 telefonora deituta edo helbide elektronikora mezua idatzita erreserba daitezke.
