Lezoarren iritzia jaso nahi du udalak etorkizuneko bide orria idazteko
Inkestak egingo ditu Lezoko Udalak hilaren 13tik —astelehena— aurrera lezoarren iritzia jasotzeko.
Astelehenean hasiko dira inkestak egiten lezoarren iritzi eta kezkak jaso asmoz. Herritarren kezkak, zalantzak eta desioak entzun nahi ditu udal gobernuak. Horrela agindu zuen hauteskunde kanpainan, eta hitza betetzera dator orain. Horretarako, inkestak egingo dizkie lezoarrei hilaren 13tik aurrera. Argi mintzatu da Mikel Arruti alkatea: “Herria denok osatzen dugu, eta eragileen eta herritarren iritziak kontuan izan nahi ditugu etorkizuneko erabakiak adostuak eta egokienak izan daitezen”.
Denen iritzia jaso asmoz, inkesta zabala egingo duela jakinarazi du gobernu taldeak. Gehienak telefono bidez jasoko dituzte, eta herritarrei Lezoren gainean orokorrean, udal kudeaketaren, eta hurrengo urteetara begirako proiektuen gainean galdetuko diete. Lan hori egiteko Aztiker ikerketa gunearen laguntza izango dutela azaldu du Iker Salaberria Parte Hartze zinegotziak.
Datorren astelehenean abiatuko dute iritzi bilketa eta abenduan amaituko dute, “herritar guztien lagin adierazgarria izan dadin, 360 herritarren iritziak jasotzea aurreikusi dute. Horrenbestez, deia jasoz gero , asko eskertuko genuke herriko bizilagunek erantzuteko tartetx0 bat eskaintzea”. hamar minutu inguru iraungo duen elkarrizketa izango da, eta informazioa “oso baliagarria” izango zaiela nabarmendu du Arrutik.
Inkestak agintaldi hasieran eta amaieran errepikatuko direla jakinarazi du alkateak, bestalde: “Iritzi horien bilakaera aztertzeko”.
