Haurren partaidetza sustatzeko proiektu pilotuan parte hartuko du udalak
Haurrak ahalduntzeko eta aniztasunari ahotsa emango dion parte hartzearen kultura berri bat sortzea du helburu proiektuak.
Oñatin egin zuten aurkezpen jardunaldia, urriaren 28an. Oiartzungo Udalak jakinarazi duenez, haurren parte hartzea sustatuko duen proiektu pilotu batean parte hartuko dute. Oinherrirekin eta herriko eragileekin batera arituko da elkarlanean.
Oiartzungo haurren “parte hartzerako kanal iraunkorrak” sortu nahi dituztela gaineratu dute. Hainbat helburu izango ditu: haien garapen integralean sakontzen jarraitzea, ahalduntzea, subjektu moduan auto-antolatzen hasteko baldintzak sortzea eta aniztasunari ahotsa emango dion parte hartzearen kultura berri bat sortzea.
Oinherrik bultzatutako ekimena da. Proiektuaren diseinuan parte hartzera gonbidatu ditu udalak herrian haurrekin lan egiten duten eragileak: ikastetxeak, hezkuntza ez-formaleko hezitzaileak eta guraso elkarteak.
Animatzen direnekin, udal teknikariekin eta zinegotziekin osatuko dute haurren parte hartzea nola egituratu eta landu definituko duen talde motorra. Azarotik maiatzera egingo dituzten zazpi saioetan zehaztuko dute, Oinherriko dinamizatzaileen laguntzarekin.
Esperientzia pilotu horretan hartuko dute parte Hernanik, Segurak eta Itziarrek ere.
“Indarrak metatu”
Proiektu pilotua aurkezteko jardunaldia antolatu zuen Oinherrik urriaren 28an Oñatin. Udalak adierazi duenez, Garazi Urdampilleta alkateordeak parte hartu zuen aurkezpenean eta pilotajean parte hartzeko arrazoiak azaldu zituen.
“Gaia oso interesgarria da eta Oiartzunen zerbait egiteko beharra sumatzen genuen. Herrian mugimendu eta iniziatiba ezberdin asko dago eta hauek guztiak egituratu nahi ditugu”. “Indarrak metatu” nahi dituztela azaldu zuen, “eragin handiagoa” lortzeko.
Egitasmoan parte hartzeko gonbidapena “pozez eta irrikaz” hartu zutela gaineratu zuen eta hankak lurrean, poliki eta tentuz egingo dutela bidea. “Parte hartzea haurren kulturatik ulertzeko ekarpen handia egingo duela pentsatzen dut eta zeinek jakin, agian herriko parte hartzeko kultura ere aldatzeko gai izango gara”.
