Osasun publikoaren egoera salatzeko elkartu dira Iztietan
Zerbitzu desberdinen 'degradazioa' urrunetik datorrela eta osasuna negozio bihurtzen ari direla salatu dute. Bihar mobilizazioak egingo dituzte hiriburutan.
Gaur Iztietako anbulatorioaren aurrean elkartu dira hamarnaka lagun, osasungintza publikoak bizi duen egoera salatzeko, Osasun Publikoaren Aldeko (OPA) plataformaren deialdiari erantzunez. Bide batez, “Denon Bizitzak Erdigunean” ekimena deialdira batu eta hilaren 30eko Greba Feminista Orokorrera dei egin dute ere.
Osasuna “eskubide” dela aldarrikatu dute, eta hura negozio bihurtzea ez dela onargarria: “are gehiago, herri administraziotik negozioak sustatzea, eta osasun pribatua eraginkorra dela sinestaraztea”. Osasun publikoa “ekitatiboa” izan daitekeen “bakarra” dela adierazi dute ere; herritarren beharren araberakoa, alegia.
Osakidetzaren degradazioa “urrunetik” datorrela salatu dute, agintari politikoek “nahita eta etengabe” hondatzearen ondorioz: garbiketa zerbitzuak, jantokia, anbulatorioak, dialisia, laborategiak eta bestelakoak pribatizatu dituztela oroitu dute. Larrialdiak, haurren osasun mentala, anatomia patologikoa bezalako zerbitzuek antzerako egoera bizi dute, eta “ate birakarien” bidez, Queralty, IMQ, eta bestelako enpresak negozioak egiten ari direla salatu dute.
Hori guztia dela eta, bihar, larunbata, Donostian (17:00etan) eta, Gasteizen (12:00etan) Bilbon (12:00etan) egingo dituzten mobilizazioetan parte hartzera egin dute dei. Gipuzkoako deialdia Boulevardetik abiatuko da.
Bukaeran, azaroaren 30eko Greba Feminista Orokorrera begira Errenteria-Oreretan egingo diren ekimen desberdinetan parte hartzera deitu dituzte herritarrak.
