Gaztaina usainak Pasai Antxo hartuko du larunbatean
Papineko Gazteriak Gaztain Eguna antolatu du larunbat honetarako. Antxotarrek eguna jai giroan ospatuko dute, eta egun osoko programazioa ondu dute antolatzaileek.
2022ko Antxoko Gaztain Eguna. Larunbatean, hilak 18, gaztaina usainak Pasai Antxo hartuko du, Gaztain Eguna antolatu baitu Papineko Gazteriak. Antxotarrek eguna jai giroan ospatuko dute, eta egun osoko programazioa ondu dute. Jarduera gehienak Biteri plazan izango dira.
Goizean goizetik jarriko dira martxan antxotarrak, 11:00etan herri kalejira egingo baitute dultzaineroekin. 12:00etan, pilota partida profesionala jokatuko da Ibaiondo pilotalekuan. 13:00etan, aldiz, karropoteoaren txanda izango da.
14:30ean bertso bazkari herrikoia egingo dute Libe Goenaga Arrieta, Emaitz Murua Arzallus eta Haritz Casabal Pikabea bertsolariekin. Bazkariko tiketak Ibaiondon eta Axularren eskura daitezke. Bihar (hilak 14) da tiketak erosteko azken eguna. Horrez gain, aurten catering zerbitzua egongo dela aurreratu du Papineko Gazteriak; hortaz, ez da epez kanpoko erreserbarik onartuko.
Helduen menuak 17 euroko prezioa du, eta honakoak sartzen ditu: entsalada mistoa, txorizo odolki egosia, oilasko errea piperrarekin eta txokolatezko browniea. Sagardo kupela, ura, kafea, kopa eta ogia barne. Haurren menuak, aldiz, 12 euroko kostua du, eta honakoak sartzen ditu: makarroiak, pintxo morunoak eta postrea. Zukua, ura eta ogia barne.
Sabelak bete ondoren, Antxoko pala final handia jokatuko da Ibaiondo pilotalekuan, 18:00etan. Helduen pala txapelketako irabazleak eta Papineko irabazleak nor baino nor arituko dira txapelketaren lehian.
19:00etan, gaztainak erreko dira, eta ondoren, musikak Biteri plaza hartuko du. 20:00etan, Bada Giro erromeriak Antxo girotuko du. 23:00etan, Borrokaren doinuak taldearen kontzertua hasiko da. Azkenik, 01:00etatik aurrera, Etxeko DJk gaua girotuko du.
Gaztain Egunaren programazioa:
- 11:00: Herri kalejira dultzaineroekin.
- 12:00: Pilota partida profesionala, Ibaiondo pilotalekuan.
- 13:00: Karropoteoa.
- 14:30: Bertso bazkari herrikoia. Bertsolariak: Libe Goenaga Arrieta, Emaitz Murua Arzallus eta Haritz Casabal Pikabea.
- 18:00: Antxoko pala final handia, Ibaiondo pilotalekuan. Helduen pala txapelketako irabazleak vs Papineko irabazleak.
- 19:00: Gaztain erretzea.
- 20:00: Bada Giro erromeria.
- 23:00: Borrokaren doinuak.
- 01:00: Etxeko DJ.
*Zehaztutakoak izan ezik, ekintza guztiak Biteri plazan izango dira.
