Biteri plazak jolasgune berria du behin-behinean
Gure Zumardian eta Ibaiondo pilotalekuaren inguruan zeuden aisialdiko instalazioak Biterin birkokatu dira. Topoa lurperatzeko lanek eragindako aisia espazio ezari erantzun dio udalak.
Pasaiako udal gobernu taldeak Pasai Antxoko Gure Zumardian eta Ibaiondo pilotalekuaren inguruan zeuden zabuak eta aisialdiko instalazioak behin-behinean birkokatu ditu Biteri plazan, lehen alkateordetza zegoen lurzoruan.
Atzo hasi ziren parke berria sortzeko lanekin, eta aurreikuspenen arabera, aste bukaerarako erabilgarri izango da haur eta familiei begirako aisialdiko eremu berria.
Topoa lurperatzeko jarduketen barruan, aipatutako jolasguneetako instalazioak kendu eta biltegiratu egin ziren. Horiek Biteri plazan behin-behinean birkokatzeaz gain, bi edo hiru banku ezarriko dira eremu horretan.
Parkea birkokatzeaz gain, udalaren asmoa da Ibaiondoko zabalguneko foot-ponga eta kanasta ere Biterin jartzea. Bi instalazio horiek obren eremuan daude, eta zerbitzuetako langileek egiaztatu beharko dute birkokatzeko moduan dauden.
Lanen aurrekontua 13.733, 50 eurokoa dela jakinarazi du udalak, BEZ barne. Kopuru horrek barne hartzen ditu Gure Zumardiko instalazioak desmuntatzeko eta Biterin birkokatzeko lanak. Horrez gain, Biteri plazan egokitutako eremuan kautxuzko lurzoru berria ere jarriko da. Jarduketa hori ere aurrekontuaren barnean sartzen da.
Udalak nabarmendu du Biteriko eremuaren sorrera “behin-behinekoa” dela. Birkokatze horren helburua da Pasai Antxoko haur eta familientzako aisialdi eta hedapen espazio bat sortzea, “obren ondorioz sortu den jolaserako espazioen gabezia arintze aldera”.
Udala jakitun da egun Biteri plaza dela Antxoko “ekitaldi eta ospakizun gehienak har ditzakeen eremu bakarra”. Hori dela eta, obrek okupatzen dituzten eremuak libratu arte, “haurren aisia eta herri ospakizunak” bermatzeko apustua egin nahi du udalak.
Parkea birkokatzeko erabakiak egungo udal gobernua osatzen duten alderdiek hauteskunde kanpainan Antxoko hainbat bizilagun, eragile eta elkarterekin hartutako konpromisoari erantzuten diola adierazi du udal erakundeak. Eragile eta elkarteek salatu zuten, topoa lurperatzeko obrengatik, barrutian ez zegoela aisia eta hedapen espaziorik, eta zeudenetako batzuk “egoera kaskarrean” zeudela.
Parkeen egoeraren azterlana
Udal gobernuak jakinarazi du Pasaiako parkeen egoerari buruzko txosten bat eskatu ziola Zerbitzu sailari. Txosten horretan herriko jolasguneen egoera eta beharrak jaso dira.
Antxokoaren ondoren, San Pedron gauzatuko da hurrengo jarduketa. Hainbat gurasok kezka adierazi dute bertako parkeko lurraren egoerarekiko, “haurrentzako arriskutsua” izan daitekeelakoan. Egoera horri erantzuteko, 8.000 euro inguruko inbertsioa egingo du udalak parkea altxa eta homologatutako lurzoru berri bat jartzeko, “istripuak ekiditeko” helburuarekin.
