Lau establezimendutik hiruk egoki betetzen dute terrazen ordenantza
Ordenantzaren betetze maila aztertu du udalak, eta "modu positiboan" baloratu; izan ere, ostalarien %74k zuzen betetzen du. Arauak urratzea 650 eta 4.500 euro arteko isunekin zigortuta dago.
Terrazen ordenantza betetzeko neurriak hartu dituela jakinarazi du udalak. Joan den otsailean jarri zuen martxan terrazen gaineko araudi berria, aurreko agintaldian, ostalariekin bi urtez elkarlanean aritu ostean.
Araudi aldaketak, hainbat moldaketa suposatu zituen jarduera ekonomikoaren garapenaren, espazio publikoaren okupazio arrazionalaren, eta auzotarren atsedenaren arteko oreka lortzeko. Besteak beste, terraza ordutegiak zabaltzea eta ordura arte lizentziarik ez zuten lekuetan terraza jartzea ahalbidetu zuen. Halaber, terrazak dituzten establezimenduek, onartutako mahai kopurua eta horien kokalekua erakusten duen eranskailua agerian izatea eskatzen du araudi berriak.
Betetze maila «positiboa»
Ordenantzaren betetze maila aztertu du orain udalak, aldez aurretik jakinarazita establezimenduei. Udaltzainek aldizkako kontrolak egin dituzte horren harira: «Betetze maila oso positiboa izan da, establezimenduen %74k betetzen du».
Araudia betetzen ez duten kasuekin ere egin du topo udalak: “Baimendutakoak baino mahai gehiago jartzen dutenak, baimendutakoa baino espazio publiko gehiago okupatzen dutenak, oinezkoen pasabidea zailtzen dutenak, edo eremu publikoan terrazetako materiala uzten dutenak gauez. Arauak urratzeak 650 eta 4.500 euro arteko isunekin zigortuta dago».
Ordenantza betetzea udalerriko bizikidetzarako betetzea «garrantzitsua» dela nabarmen jarri du udalak eta gogorarazi die establezimenduei “derrigorrezkoa dela” baimenduta dituzten mahai kopurua eta kokapena azaltzen duen eranskailua agerian izatea, baita gauez, debekatuta dagoela terrazetako mahai, aulki eta bestelako materialak bide publikoan pilatzea, “zigortu daiteke jarduera amaitutakoan terraza gauez ez jasotzea” .
