Hasi dira Motxian Eby-ren erronkak
Lehen bideo erronkari berri hilaren 13an eman zuen Julen Castillo aktoreak. Bigarrena otsailean azalduko du.
Bi erronka izango ditu Motxian EBY-ren edizio berriak. Jada abian da gazteek ikus-entzunezkoak euskaraz sortzeko egitasmoa, aldi berean lehiaketa dena. Hirugarrenez proposatu du formatu hori Oarsoaldeko Euskara Batzordeak, eta 12-16 adin tarteko gazteei dago bideratua. Julen Castillo aktoreak botako dizkie erronkak eskualdeko gazteei. Bi egingo ditu guztira. Erronka horien berri izateko eta informazio gehigarria eskuratzeko joan egitasmoaren webgunera.
Lehenaren berri hilaren 13an eman zuen aktoreak. Hona hemen, bideoan, horren berri:
Erronka zein den ikusita, gazteek hilabete pasatxoko izango dute horri erantzuna emateko, abenduaren 17ra arte zehazki. Bigarren erronka otsailean ezagutaraziko dute (horren barruko bideoen entrega martxoaren 10era arte entrega daiteke). Baina tartean, urtarrilean, Asmazank lehiaketak antolatuko dituzte eskualdeko herrietan. Erronka bakoitzeko hainbat sari banatuko dituzte. Edonola ere, honakoak dira oinarri zehatzak (klik egin hemen).
Sariak
Saridunak Julen Castillo zirikatzaileak eta eskualdeko gazteek erabakiko dituzte. Honakoak dira sariak:
- Erronka bakoitzeko bideorik onenarentzat: 150 euro.
- Bi erronkak bukatzean, bideo guztien artean onenarentzat saria: 200 euro.
- Herri bakoitzeko bideo onenarentzat saria: 50 euro.
