Santa Zezilia egunaren harira hitzordu bikoitza du EMKE Bandak
Artzai Onean izango da lehen emanaldia, larunbatean 20:00etan; bigarrena Fatima Andra Mariaren elizan izango da, hilaren 24an, 20:30ean.
Otxoa, Gartzia, Aierdi eta Loiarte gaurko agerraldia egiterakoan. Hilaren 22an izango da Santa Zezilia eguna eta horren harira, hitzordu bikoitza izango du EMKE Bandak. Lehena, larunbatean izango du (hilaren 18an), Donostiako Artzain Onaren katedralean 20:00etan. Bigarrena, Fatima Andra Mariaren elizan izango da hilaren 24an, ostirala, 20:30ean. Donostiako Mariaren Bihotza abesbatza, Hondarribiko Eskifaia abesbatza eta Ana Otxoa Pando sopranoarekin batera ariko da musika banda bi emanaldietan.
Bi kontzertuen xehetasunak gaur eguerdian egindako agerraldian eman dituzte Alain Aierdi EMKE Banda eta Mariaren bihotzaren abesbatzako zuzendariak, Edurne Loiarte abesbatza horretako lehendakariak, eta Ana Otxoa sopranoak. Bietan, zuzendari, Aierdi.
Musikari zein kantariek arreta handiz prestatu dituztela bi kontzertuak esan du Aierdik, “egitarau exijentea eta, zalantzarik gabe, bertaratzen diren guztien gustukoa izango dena. aukera paregabea izango da hiru musika ahots talde hauek elkarrekin entzuteko”. Artzain Onean joko duen lehen aldia izango du EMKE bandak larunbatekoa.
Bi kontzertuak doakoak izango dira, baina larunbatekoa, solidarioa izango da, Munduko Begiak GKEri eskainiko diote kontzertua. behar gehien duten herrialdeetan begi osasunaren gaineko formakuntza, interbentzioak eta zainketa egiten dituzte, “30 eurorekin lauzpabost interbentzio egiteko gai dira, edozein ekarpen txiki, beraz, ikaragarria da haientzat”.
Abesten 70 lagun inguru ariko dira bi abesbatzetako kideak kontatuta, “koro nahiko handia izango da beraz, eta guretzat, EMKErentzat luxua da beraiekin batera aritzea”. Bi atal izango dituela kontzertuak azaldu du Aierdik, “lehen atalean musika banda bakarrik ariko da, eta atal motza izango da. hamar minutuko obra izango da, indar handikoa, baina laburra esna moduan”.
Bigarren zatia abesbatza eta solistarekin izango da eta denak obra erlijiosoak izango direla azaldu du, “ez liturgikoak, baina gaitegi erlijiosoa dutenak. Jendeak oso gustura hartuko du eta gozamena izaten ari dira entseguak”.
Proiektua “handia eta polita” dela euren tamainako abesbatza batentzat esan du Loiartek, “guk a capella edo organoz lagunduta abestu ohi dugu. Urtean behin Donostiako Udal Txistulariekin egiten dugu Gabonetako kontzertua baino, horrelako banda handi batekin ez gaude ohituta, Errenteriako Musika Bandarekin are gutxiago. Errenteria beti izan da abesbatzentzat erreferente bat, finean, lan handia egiten da arlo horretan. Bandak proiektu oso handiak egiten ditu. Guretzat, beraz, pribilegioa da bi kontzertu horietan aritzea”.
Otxoak ere eskerrak eman ditu aukerarengatik. Carmina Burana lana egin zuen iaz musika bandarekin batera eta emaitza “oso polita” izan zela esan du. lehen aldia izango du bi abesbatza horiekin batera ariko dena, “hemengo abesbatzen kultura ikaragarria da. Jende guztia animatu nahi dut kontzertuetara, errepertorioa oso polita delako eta hunkigarria”.
Maite Gartzia kultura zinegotziak ere hartu du parte agerraldian eta bandari egiten duen lan “handia” eskertuta eta herritarrek sentitzen duten “harrotasuna2 nabarmen jarrita, emanaldiez gozatzera deitu du. Sarrera, esna moduan, doakoa da bi emanaldietarako aforoa bete arte. Larunbateko kontzertuan, 700 leku izango direla aurreikusi dute; hilaren 24koan, berriz, 500.
