Lezo Institutuaren auzolana, herrira zabalik
Altabira proiektuaren barruan, urmaela eta tximeleten oasia eraikiko dituzte hilaren 26an, herrikideekin.
Lezo Institutuak urmael bat eta tximeletentzako oasia egin nahi ditu, bai eta ikastetxearen inguruan hainbat txukunketa lan egin Altamira auzoan. Hori sortzeko modurik egokiena auzolana dela erabaki dute: hilaren 26rako deitu dituzte lezoar guztiak saretze ariketa egitera, elkarrekin ingurumen eta hezkuntza gunea sortzera. 10:00etarako egin dute hitzordua, Institutuan bertan. Inguruko biodibertsitatea areagotzeko azpiegitura sortzeaz gain, fruta arbolen landaketa, lorontzien landaketa eta baratzeen txukunketa egingo dituzte. Jarduna bukatzeko, merezitako bazkaria: 14:00etan herri bazkaria egingo dute Altzate Auzo Elkartean (txartelen prezioa 16 eurokoa da). Egun biribila auzolanean aritzeko.
Egunerako Lezoko Udalaren eta Aranzadi Zientzia Elkartearen, eta Zerynthia elkartearen laguntza izango du Institutuak; hala nahi duten herritar guztiek osatuko dute auzolanaren mamia. Hala, jardunari testuingurua emateko, Aranzadiko Ion Garinek eta Neikerreko Aitor Cevidanesek azalpenak emango dituzte. Izan ere, hilaren 26koa (igandea da) egitasmo zabalago baten zati baita: Altabira proiektua.
“Institutuak badaramatza urte batzuk eraldaketa prozesu batean murgilduta, eta eraldaketa horretatik sortu zen Altabira berrikuntza proiektua, inklusioa, hezkidetza eta jasangarritasuna sustatu nahi dituena, besteak beste. Altabiraren barruan, hainbat helburu zehaztuta ditugu. Horietako bat kanpo espazioaren eraldaketa fisikoa da, eta beste bat, ikastetxea herrira eta auzora zabaltzea eta ikas komunitatearekin daukagun harremana estutzea”, azaldu dute hezkuntza zentroko kideek.
Iazko martxoan ere egin zuten auzolana. Arrakastatsua izan zen. Horregatik, aurten ere herrian eragiteko jardunaldia errepikatzeko hautua egin dute. Eusko Jaurlaritzaren Ekonomiaren Garapen, Jasangarritasun eta Ingurumen Sailaren diru laguntza bati esker burutuko da.
Auzolanean parte hartzeko aurrez izena eman behar da. Horretarako formularioa eskuragarri jarri dute Lezo Institutuko kideek. Hemen klik eginda joan daiteke hara.
