[Bideoa eta argazkiak] Pasaian, euskarak badu sarea
Bokaleren I. Topaketa egin zuten atzo Antxoko Kultur Etxean. Pasaiako euskararen ekosistema saretzen ari direnena izan zen ilunabarra.
Ekitaldiaren bukaerako talde argazkia Sareak gauzak hartzeko, gordetzeko, garraiatzeko izan daitezke. Zuloak dituzte, baina egitura trinkoa dute, batuta daude soka zati den-denak. Sareek segurtasun funtzioa bete dezakete aldi berean, noizbait norbait edo zerbait amildegira erortzea eragotzi dezakete, adibidez. Atzo Jaime Altuna Gizarte Antropologo hondarribiarrak adierazi zuen, hark egindako tesian oinarrituta, euskarekin haur eta gazteek funanbulista izatearen sentsazioa dutela, euskararen eta erdaren artean oreka zail horretan dabiltzala, eta agian, maizegi, hizkuntzaren erabileran ahalegin gehiegizkoa eskatzen zaiela ez dagozkien ardurak egotziz; baina azpian sarea dute. Pasaian, sarearen kontzeptua era integralean dute barneratuta. Integraltasun hori azalera atera zen atzo arratsaldean Antxoko Kultur Etxean: Bokaleren I. Topaketa egin zuten. Teo Alberro alkateak eta Laura Re Euskara zinegotziak eman zioten testuingurua bilkurari.
Pasaiako Euskararen Aholku Batzordea da Bokale. Bertan, askotariko alorretan dabiltzan herritarrek dute ordezkaritza. Pasaiako Udalaren Euskararen II. Plan Estrategikoaren barrukoa da lantaldea. Atzo, egiten ari direnaren berri emateko eta hainbat aitortza egikaritzeko bildu ziren bertako partaideak, eta euskalgintzarekin era batera edo bestera bat egiten duten pasaitarrak, Antxo erdialdeko aretoan. Lepo bete zen. Euskararen biziberritzean lanean ari diren ordezkariak elkartu, herrian egiten ari diren lanaren berri eman, eta haien lanari balioa eman zitzaion atzokoan.
Aitortzak. Herriko Mintzalagun egitasmoko kideek, nahiz Pasaiako barrutietan Gau Beltzak antolatu zituztenei oles egin zieten atzo. Hitzekin eta oroigarriekin. Pasaiako euskararen ekosistemaren alde egindakoa aitortu zieten atzo dozenaka pasaitar euskarara eta euskaratik saretu dituzten bi egitasmo horiei. Bakoitzak bere erara, Pasaian euskararen normalizazioan bidea egitea aitortu zieten atzokoan. Mari Luz Etxanizek egindako margolana, Eider Perezen bertso batekin, eman zizkieten.
Egindakoak. Bokaleren barruan, arlokako lanketak garatzen ari dira. Horiek aurrera eramaten ari direnek euren testigantza eman zuten. Erronkak, beharrak, desioak, egindakoak, elkarlanak, lehentasunak edo hartutako konpromisoak azaldu zituzten. Haur-gazteen aisia eremuan dabiltzanek, euskaltegietako ordezkariek, ikastetxeetako kideek, lan mundukoek, merkatariek, gazteek, edo euskarari bultzada emateko barrutietan lanean dabiltzan eragileek eman zituzten testigantza horiek. Egindakoaz, eta egiten ari direnaz aritu ziren. Eragiten jarraituko dute.
Jaime Altunak bere hitzaldiaren hasieran Pasaiako errealitate soziolinguistikoa ulertzeko hainbat datu eman zituen. Horietako bat da herrian euskaldunen kopurua bikoiztu egin dela azken hamar urtean, hain zuen Pasaiako Udalak lehen plan estrategikoa abian jarri zuenetik. Sarea badago, beraz. Orain, sare horren zuloak murriztarazteko bidea da egin beharrekoa, sarea salbaziorako baino, elkar euskaraz aritzeko eta bizitzeko izan dadin.
Ondokoak atzoko hainbat irudi eta bideoa dira. Ikus-entzunezkoaren protagonistak Antxoko Gau Beltzaren zati izan ziren haurrak dira, dantzan.
