Gobernu taldearen aurrekontuari "anbizio falta" egotzi dio PSE-EEk
Alderdi sozialistak dio aurrekontu proposamenak ez diela "oinarrizko erronkei" erantzuten.
Aurrekontu proposamenaren gaineko balorazioa egin dute sozialistek. Argazkia: PSE-EE Gobernu taldeak egin duen aurrekontu proposamenak “oinarrizko erronkei” erantzuten ez diela, eta “anbizioa” falta duela uste du PSE-EEk. Hala jakinarazi du Isaac Palenciak sozialisten eledunak komunikabideetara helarazitako prentsa ohar bidez: “Gipuzkoako hirugarren udalerrian gara, eta maila horretan ariko den udala merezi dugu. EH Bilduk egin duen udal aurrekontuaren kudeaketa ikaragarri hobetu daiteke”.
Azken horren adibide “geldirik diren edo urte askoz atzeratzen diren proiektuak” jarri ditu Palenciak: “Topoaren lurperatzea, Gabierrotako pasealekuaren berritzea, Beraun kalearen biziberritzea, edo Olibeteko aparkalekua, beste askoren artean”.
“Hutsunea” ere antzeman du sozialistak, “etorkizun iraunkorra eraiki, aldaketa klimatikoari aurre egin, mugikortasun eta hirigintza jasangarria sustatzea dute helburu lurralde osoko hiriek, gobernu taldearen aurrekontuak, erabakigarri diren alor horietan ez du estrategia argirik”. Arlo horiek lehenesteko eskaera luzatu dio Palenciak gobernu taldeari aurrekontu proposamenean, “erdigunean jarri behar dira jasangarritasuna, aldaketa klimatikoari aurre egiteko borroka, eta herritarren ongizatea”.
