Aiton Bordako kopek jabeak behar dituzte
Lezoko erretiratuen elkarteak, bere erara, Olinpiar Jokoak antolatu ditu. Jardueraren helburua da elkarteari bizitza eman eta adinekoen elkargune izatea. Izen emateak apal doaz, ordea.
Aiton Borda Lezoko Jubilatuen eta Pentsiodunen elkarteak Olinpiar Jokoak antolatu ditu. Jada badituzte irabazleentzat kopak, elkartearen sarreran daude ikusgai. Horiek nork jasoko dituen esatea, ordea, zaila da. Ez olinpiar aroaren barruko jolasetan onenak izango direnak aurreratzea gehiegitxo delako. Beste bat da arazoa: izen ematea oso apal doa. Kezka dute arduradunek. Topaketak adineko lezoarren laguntza behar du.
Olinpiar Jokoen barruan bingoa, dominoa, karta jolasak, edo punteriazkoak (toka edo igela) izango dira. Baina irabazleen dinamikatik at, helburu lurrezkoagoak ditu egitasmoak: elkartean mugimendua izan dadila, eta aldi berean, adineko lezoarrek giro atseginean elkartzeko aukera izatea. «Baina zaila izaten ari da hori», esan dute zuzendaritzako kideek.
Hala, ikasturtean zehar egiten diren jarduera iraunkorretan (dantza, eskulanak, memoria, bingoa…) dezenteko partaidetza izaten dela adierazi dute erretiratuek, baina egun jakin baterako gauzak egiten direnean, ordea, kamuts gelditzen dira jendea biltzeko ahaleginak. «Adibidez, Gernikara egin genuen bidaiarako 30 lagunek eman zuten izena. Oso gutxi autobus oso baterako. Baztanera egindako hurrengorako erabaki genuen izena emateko garaian gure bazkide ez direnei ere ematea aukera. Hala gabiltza».
Era askotara saiatzen ari dira bazkide direnak jarduera puntual horietan izena eman dezaten. Orain, elkartearen kanpoaldean oharretarako panel berria jarriko dute.
Abenduaren 15a
Azaro bukaeran dira hastekoak Olinpiar Jokoen barruko jolasekin, ahal bada behintzat. Abenduaren 15erako, ordea, bukaerako festa antolatu dute Aiton Bordako tabernan bertan: Euskal Parrillako kideek egindako bazkariaz gozatzeko aukera izango dute, eta bertan, olinpiaden sarien banaketa, nahiz parte hartzaile guztientzat zozketa bidezko oparien banaketa egingo dute. Sutargi Abesbatzak ere parte hartuko du. «Mugimendua sortu nahi dugu, elkar egon. Soinua egin, hemen gaudela esan. Ea jendea animatzen den». Astearte eta ostegunetan, goizez, jasotzen ari dira izen emateak euren egoitzan.
