[Erreportajea] OnHartu, teknologia berriak arduraz erabiltzeko egitasmoa
Pasaia-Lezo Lizeoko guraso talde baten kezkatik sortutako taldea da. Teknologiekiko harreman eredu arduratsuago eta kontzienteago bat sustatzea dute xede, erabilera okerrak minimizatuz.
![](https://oarsoaldea.hitza.eus/site/files/2023/11/onhartu.jpg)
Sarritan esan ohi da teknologien erabilera desegokiak eragin kaltegarriak dakartzala haur, gazte eta nerabeengan. Kezka horretatik abiatuta, Pasaia-Lezo Lizeoko Lehen Hezkuntzako guraso talde batek OnHartu proiektua abiatu du. Finean, haien helburua da teknologia berriak modu arduratsuan baliatzea eta erabilera okerrak ahalik eta gehien minimizatzea.
Ibon Sanz guraso talde horren kide da, eta taldearen hastapenak azaldu ditu. Aurreko ikasturtean, gurasoek formakuntza bat jaso zuten sakelakoen eta pantailen erabilerak haur eta gazteengan duen eraginaren inguruan. Saio hartan taldea sortzeko proposamena jarri zuten mahai gainean, eta guraso batzuk elkartu egin ziren gailu horien «erabilera arduratsua» bultzatzeko. Talde horri OnHartu izena jarri diote, honako arrazoiarengatik: «Teknologia berriak onartzen ditugu, hartzen ditugu, baina ondo hartu behar ditugu, hitz joko hori islatu nahi izan dugu».
Proiektuaren oinarriak finkatuta, hiru helburu zehaztu zituen guraso taldeak: gurasoek eta ikasleek formakuntza jasotzea eta seme-alabei mugikorra emateko adina atzeratzea. OnHartu proiektuko kideek funtsezko ikusi zuten gurasoak formatzea; izan ere, familia guztiek ez dute informazio bera eskura, eta mugikorrak dakartzan eraginak ikusita, formakuntza behar zutela argi ikusi zuten. Horrez gain, gurasoak haien seme-alaben «eredu» direla argi du Sanzek. Hori dela eta, «kontziente» izan behar dira gailu elektronikoak «era arduratsuan» erabili behar dituztela egunerokotasunean seme-alabak ere bide horretan hezi nahi badituzte.
Gurasoez gain, ikasleek ere formazioa jaso behar zutela ziur ziren. Haien ustez, etxean jarduteaz gain, gai hori ikastetxean «indartu» behar zutela argi zuten. Azkenik, eta «premia handiena» zuena, sakelakoak emateko adina atzeratzea dela adierazi du Sanzek: «Horren gazte direnean ez daude prest tresna horiek behar den moduan erabiltzeko. Gurasoek ere presio soziala dugu, ingurukoei mugikorrak ematen baitizkiete. Beste leku batzuetako esperientziatik abiatuta erabaki kolektibo bat hartu genuen, denen artean errazagoa baita mugikorra emateko adina atzeratzea».
Sanzek nabarmendu du aditu askok diotela 16 urte betetzen diren arte, gazteak ez direla gai «tresna horiek eskaintzen dutena era arduratsu batean erabiltzeko». Hori dela eta, guraso taldeak eskatzen duena da emate adin hori «ahalik eta gehien atzeratzea». Hala ere, OnHartu proiektuko kideek argi dute beren asmoa ez dela «debekatzea edo epaitzea», baizik eta teknologiekiko «harreman eredu arduratsuago eta kontzienteago bat ezartzea, adingabeek teknologiak egoki erabil ditzaten».
Guraso taldearen asmoa da, momentuz, urtean behin elkartzea ikusteko egoera zertan den: «Urtez urte goaz. LH6koak, adibidez, ikasturtea bukatzerakoan bilduko gara zein asmo edo indar dauden ikusteko eta datozen urteetan berbera proposatzeko. Geroz eta gehiago izan, errazagoa izango da emate hori atzeratzea».
Informazio guztia gurasoen eskura jartzeko xedearekin, blog bat ere sortu dute: onhartu.wordpress.com.
Alternatiben aldarrikapena
Sanzek baietsi du guraso askoren argudioa mugikorra ematerako garaian dela seme-alabak «lokalizatuak» egotea. Hala ere, «alternatibak» badirela esan du OnHartuko kideak; esaterako, internet konexio gabeko gailuak, deiak egiteko balio dutenak. Tolosan abiatutako egitasmoa ere aipatu du: komertzio batzuetan pegatina bat jarri dute, eta haurrek badakite bertara joanda dei bat egin dezaketela. «Horrelako egitasmoak martxan jarri nahi ditugu», aurreratu du.