Udalak AHTaren aurkako alegazio berria aurkeztuko du
Proiektuaren bideragarritasuna zalantzan jartzen zuten hainbat alegazio egin zituen 2020an, eta orain heldu da Sustapen Ministerioaren erantzuna.
Joana Mendiburu alkatea eta Agustin Lekuona Hirigintza zinegotzia. Oiartzungo Udalak Abiadura Handiko Trenaren (AHT) aurkako alegazio berria aurkeztuko du. Adierazi dutenaren arabera, ADIFek 2020an bidali zuen azkeneko aldiz udalera estudio informatibo bat. Asmoa hurrengoa da:trenbideak Donostiatik ez igarotzeko, merkantzien garraiorako Astigarraga-Oiartzun-Lezo tartea baliatu nahi dute, trenbideak bikoiztuz. Udalak herriari zein eratan eragingo liokeen azpimarratu nahi izan du: “zentzugabekeria ekonomiko eta ekologikoa” iritzi diote, herriaren “interes orokorrarekiko” erabat desegokia. Hori dela eta, honezkero duela hiru urte arrazoiak azalduz alegazioak aurkeztu zituen udalak.
Orain duela hilabete inguru jaso zuen Oiartzungo Udalak helegite horren erantzuna. Espainiako Sustapen Ministerioak “entzungor” egin diela salatu du udal gobernuak. Azterketa berria oso “azalekoa” dela eta helegitean ageri diren kezkak “hurrengo faserako” utzi dituztela salatu du gainera Joana Mendiburu alkateak. Hori dela eta, udalak txosten berria landu eta desadostasunak helaraziko ditu.
Ostegunean, aurkezpen irekia
Desadostasun arrazoiak helarazteko azaroaren amaiera arteko epea du Oiartzungo Udalak. Gaia lantzeko, bada, azaroaren 23an, ostegunean, gaian interesa duten herritarrekin elkartuko da udala, arratsaldeko 18:00etan pleno aretoan. Hortaz gain, asteazkenean (hilaren 22an) AHTak zuzenean eragingo dituen bizilagunekin elkartzeko bilera antolatu dute, ordu eta leku berean.
Bi hamarkada luze
Duela 22 urte, 2001ean, abiatu zuen Espainiako Sustapen Ministerioak AHTa Oiartzundik pasatzeko prozesua, ADIFen bitartez. Orduan ere, proiektuari buruzko estudio informatiboa jaso zuten, eta udalak kontrako txostena idatzi zuen.
Urte guzti hauetan zehar, hala, estudio ezberdinak heldu dira Sustapen Ministeriotik udalera. Kasu horietan, Oiartzungo Udalak “txosten sendoak” prestatu dituela adierazi du, eta proiektuaren bideragarritasuna “zalantzan” jarri dutela, eragingo lituzkeen kalte izugarriak azalduz eta proiektua geldiarazten saiatzeko.
