Azaroaren 25arekin bat egin du udalak
Sentsibilizazio kanpaina bat abiatu dute: 'Guztiok indartsuago indarkeriarik gabe'. Asanblada Feministak deitutako elkarretaratzea babestu dute, eta ikastetxeetan egindako lanketak ezagutarazi dituzte.
Errenteriako udaletxea. Azaroaren 25erako, Emakumeen Kontrako Indarkeriaren Aurkako Nazioarteko Egunerako, Errenteriako Udalak sentsibilizazio kanpaina bat abiatu du honako mezuarekin: Guztiok indartsuago indarkeriarik gabe. Udalak martxan jarritako kanpainak “urteko egun guztietan indarkeria matxistarik gabe bizitzeko nahia” nabarmendu nahi du.
Kanpainarekin batera, beste hiru mezu ere zabalduko direla adierazi du udal erakundeak: Errenteria-Oreretan indarkeria matxistari aurre egiten diotela emakumeek; emakumeek ez dutela baimenik behar askatasunean bizitzeko; eta eraso baten erantzulea erasotzailea dela.
Era berean, Errenteriako Udalak gogorarazi du indarkeria matxistari aurre egin behar dioten emakumeentzako laguntza, informazio eta orientaziorako udal baliabideak dituela haien eskura: Gizarte Zerbitzuak eta Emakumeen Etxea.
Kanpainaren zabalkundeari dagokionean, udalak jakinarazi du pankarta udaletxeko balkoian jarriko dela eta kanpainako kartelak banatuko direla udalerriko eraikinetan, dendetan eta ostalaritzan.
Asanblada Feministaren deialdia
Errenteriako Udalak bat egin du Oreretako Asanblada Feministak egin duen deialdiarekin, eta herritar guztiak gonbidatu ditu bertan parte hartzera. Elkarretaratzea larunbatean izango da, azaroak 25, 13:00etan, Zumardian.
Herriko ikastetxeen lanketa
Hezkuntza mahaiaren bidez, bi lanketa bideratu dituzte azaroaren 25aren harira. Alde batetik, Lehen Hezkuntzako Bosgarren Mailako ikasleek Errenteria tratu onen alde izeneko erakusketa osatu dute. Ikasle gazteek egindako lanak ikustera joateko deia luzatu du udal erakundeak. Erakusketa hilaren 24tik abenduaren 15era bitartean egongo da ikusgai, Lekuona Fabrika parean.
Bestetik, Bigarren Hezkuntzako Laugarren Mailako ikasleekin bisita gidatuak antolatu dituzte azaroan zehar Emakumeen Etxea ezagutzeko. Bisita horien helburua da etxea eta bertan eskaintzen diren baliabideak erakustea, gazteentzat ere “erreferentziazko gune” bihurtzeko.
Lekuona eta Emakumeen Etxea
Aurreko urteetan bezala, Lekuona Fabrikak eta Emakumeen Etxeak hilabete osoan zehar ikusgai egongo diren indarkeria matxistei buruzko irakurketa interesguneak sortu dituzte.
