Kirolaren Aholku Kontseilua osatu nahi du udalak
Errenteriako Udalak Kirolaren Aholku Kontseiluari berriro ekin nahi dio, udalerrian dauden kirol beharrak identifikatzeko eta horiei erantzuna bilatzeko. Kontseilua osatzeko herritarrei egin die dei.
Errenteriako Udaleko Kirol departamentuak legegintzaldi honetarako duen helburuetako bat da Kirolaren Aholku Kontseiluaren jarduerari berriro ekitea. Erakunde hori 2016an sortu zen, udalaren kirol politika bultzatzeko tresna gisa.
Aholku Kontseilu horren xedea da herriko kirol eragileak biltzea, “agerian jartzeko herriak eta herritarrek dituzten beharrak, baita beharrezko baliabide eta ekimenak ere”. Behar horiei erantzuna eman nahi die kontseiluak, elkarlanean, denen laguntzarekin.
Horrez gain, udalak “gizarte eragileen inplikazioa” bultzatu nahi du, herritarrek udalerriko kirol esparruaren inguruko eztabaida eta erabaki politikoetan parte har dezaten laguntzeko. Helburua da Errenteria-Oreretak eta herritarrek “kirolaren eta jarduera fisikoaren beharrak antzematea, behar horiei erantzuteko baliabideak eta ekimenak abiatzeko”.
Kirol entitateez gain, gehienez sei pertsona dira Aholku Kontseiluko kide. Pertsona horiek “udalerrian kirola sustatzeko egiten duten lanarengatik nabarmentzen direnak edo parte hartzeko interesa erakusten dutenak” dira. Kontseiluaren araudia esteka honetan kontsulta daiteke.
Udaleko Kirol departamentuak dei publikoa egin du interesa duten pertsonek Aholku Kontseiluan parte hartzea eska dezaten, Errenteriako Udalaren Zu! arreta zerbitzuan idatzizko eskabidea aurkeztuz, hilaren 30a baino lehen.