Lezoarrena da orain Mikel Esnaolaren garaikurra
Udalaren aitortza jaso du Mikel Esnaola dantzariak, Gipuzkoar Erako Euskal Herriko Aurresku Txapelketa irabazi zuelako.
Mikel Esnaola dantzariak herriari eman dio hilaren 5ean Hondarribian irabazitakoa. Egun horretan Gipuzkoak Erako Euskal Herriko Aurresku Txapelketaren garaile izan zen dantzari gazte lezoarra, eta han eman zioten Tomas Murua eskultorearen garaikurra udalari eman dio, bertan hurrengo urteko txapelketara arte egon dadin. Lehenengoz irabazi zuen Esnaolak txapelketa hori; hirutan jarraian txapeldun izango balitz, betirako geldituko litzateke herrian kopa. Udaleko ordezkariek harrera egin diote dantzariari, Zubitxo Euskal Dantza Taldeko kideek lagunduta.
“Lan asko egin dugu garaikur hau irabazteko, eta orain herriari eman nahi diot”, esan zuen aitortza ekitaldian Esnaolak. Udalaren partetik, Mikel Arruti alkateak, Jon Legorburu Kultura zinegotziak, eta Mireia Kuesta eta Miren Ormazabalek parte hartu zuten omenaldian. “Eskerrik asko, Mikel. Oso pozik gaude, eta guretzako ohore bat da lezoar batek sari hau izatea”, esan zuen alkateak. Arrutik nabarmendu zuen herri batek duen esentzia nagusienetakoa bere nortasuna dela, eta dantza, Lezoren oinarri sendoa dela, “gure kultura da, euskal kultura da”.
Agintariak oroitarazi zuen Lourdes Esnaolak eta Joxe Juan Ugaldek egindakoari esker, herriak baduela jabegoan jada tankerako garaikur bat, haiek hiru urtez jarraian bikotekako Euskal Herrikoa irabazi zutelako. “Horrek guztiak esan nahi du Lezo lehendik ere dantzatzen duen herria dela. Gur egun ere, zorionez, emari horrek bizirik jarraitzen du. Dantzari gazteak ditugu, eta harrobi oso polita ere bai”, zehaztu zuen alkateak.
Gainera, Hondarribiko finalean beste bi lezoar ere izan zirela oroitarazi zuen Arrutik, Ane Jaunarena eta Endika Osa. Aldi berean, han izan ziren alkatea eta MIren Ormazabal zinegotzia ere, “hunkituta eta harro sentitu ginen dantzatzen ikusi zintuztegunean”.
Tomas Muruaren trofeoa utzi, baina beste bat jaso zuen Esnaolak: Lezoko armarria. Taldekideak, berriz, ez ziren omenaldiaren ikusle izatera mugatu. Aurreskua dantzatu zioten, eta txapela berriz ere jarri zioten talde argazkia atera aurretik.