"Zaintzak irauli nahi ditugu dena aldatzeko"
Hilaren 30eko greba feminista orokorraren harira agerraldia egin zuen atzo Oreretako Mugimendu Feministak.
Greba Feminista Orokorarren harira agerraldia. Argazkia: Oreretako Mugimendu Feminista “Ezinbesteko dira zaintza lanak bizitzeko”. Zaintza erdigunean jarrita hasi zuen hilaren 30erako deitu duten Greba Feminista Orokorraren gainean atzo egindako agerraldia Oreretako Mugimendu Feministak. Argi exijitu dute, “ezin dira ikusezin egiten eta merkatilizatzen jarraitu”.
Zaintzen krisiak eztanda ez egiteko gakoa ere zein den ere azaldu zuten atzo grebaren harira egindako agerraldian, “etxeko langileen esplotazioagatik da, haiek betetzen dituzte instituzioek eta familiek betetzen ez dituzten beharrak. Lan baldintza oso kaxkarrak, ezbaitako sektorearen gaineko araudirik. Ikaragarria da atzerritartasun legeak migratutako langileei ezartzen dien diskriminazioa”.
Horri guztiari, gutxi ez balitz, lanaren prekarizazioa eta langabezia, pentsio baxuak, eta etxebizitza, gasolina eta oinarrizko produktuen garestitzea gehitu dikzio mugimendu feministak, “horrek guztiak sakontzen du krisi sozialean”.
Beste gako bat ere eman dute; “klase herritarreko” emakumeak dira etxean, lantegietan, harremanetan “zaintzak sostengatzen ” dituztenak: “Denbora eta errekurtsoen pobrezia metatzen jarraitzen dugu, lan jardun bikoitzekin, urriak eta prekarioak diren zerbitzu publikoak ordezkatzen, denera heltzeko malabarrak eginez, prozesuan gure bizitzak inmolatuta”.
Bizitza duinen alde
Horren aurrean “aktibazioa” beste aukerarik ez dela aldarrikatu zuten, “zaintzak irauli nahi ditugu dena aldatzeko. Adabakiek ezin dute krisia konpondu”. Pandemia garaiari ere begirada, zaintzaren “ezinbestekotasuna” agerian gelditu zen indar biziz orduan, “egunerokora itzulita baina, garrantzi hori lausotu egin da eta ezkutuko lan, aitortza gabekoa bilakatu da berriro”. Eusko Jaurlaritzari mezu argia, “zaintza ekonomiaren menpe jartzen du hark, azalaren kolorea dena dela guk bizitzea merezi duen, bizitza duinarekin lotzen dugu zaintza; ez ditugu nahi kondarrak. Irtenbidea ez da digitalizazioaren bidetik, edo modu abstraktuan komunitarioa aldarrikatzetik helduko, horrek zaintza lanen feminizazioa eta familiarizazioa dakarrelako”.
Zaintzarako “eskubide kolektiboa” aldarrikatu dute, “pertsona guztiek bizitza osoan zehar zaintzak askatasun, duintasun, eta konpromiso baldintzetan emateko eta jasotzeko duten eskubidearen alde. Hori mendekotasun egoeretatik baino askoz harago doa. Zenbat, nola, eta nor zaindu nahi dugun erabakitzeko gaitasunaz ari gara; zaintzaren erantzukizunari pribilegiozko egoeretatik ihes ez egitea bermatzeaz ari gara”.
Ardura sozial bihurtu nahi dute zaintza, ez negozio, “eraldaketa sozialerako neurriak bultzatu nahi ditugu, zaintzak merkatu onura izateari utz diezaion”.
Hilaren 30ean kalera ateratzeko deia egin zuen azkenik atzo Oreretako mugimendu Feministak, eta auzo eta herriko ekintzetan parte hartzera, “hilaren 30ean kalea hartuko dugu berriro”.
Oreretako Batzar mixtoa osatzen duten eragileen berri ere eman zuten atzoko agerraldi horretan. Honakoak: Oreretako asanblada Feminista, Zirika, Oreretako pentsiodunen Mugimendua, Oaingoz Hau, SOS Arrazakeria, Zintzilik Irratia, Correos, Sanmarcoosene Eguneko Zentroa-Erresidentzia, Jesusen Bihotza Erresidentzia, GOT, Etxeko langileak, zaintzaileak, ESK, LAB, ELA.
Datozen egunetako mobilizazio eta deialdiak
Hilak 24, ostirala
- Elkarretaratzea Gizarte Zerbtuzen aurrean, 11:00etan.
Hilak 25, larunbata
- Emakumeen Aurkako Indarkeriaren kontrako Egunaren harira asanblada feminista 10:30ean Emakumeen Etxean.
- 13:00: Elkarretaratzea Zumardian.
Hilak 27, astelehena
- 19:00: Batzar mistoa Emakumeen Etxean.
