Abenduaren 2an Euskararen Eguna ospatuko da Trintxerpen
Trintxerpeko Korkoiburuek eta barrutiko hainbat eragilek egun osoko programazioa ondu dute, elkarlanean. Karpa nagusia Gudari plazan kokatuko dute.
2019ko Trintxerpeko Euskararen Eguneko irudi bat. Trintxerpeko Korkoiburuek eta barrutiko hainbat eragilek Trintxerpeko Euskararen Eguna antolatu dute abenduaren 2rako, larunbata. Antolatzaileek egun osoko egitaraua ondu dute, elkarlanean, eta karpa nagusia Gudari plazan kokatuko dute.
Trintxerpetarrak 11:30ean jarriko dira martxan Gudari plazan egingo diren haurren tailer eta jolasekin. 12:00etan, dantza izango da protagonista, muxikoak egingo baitira Gudari plazan. 13:00etan, aldiz, kantu poteoa egingo dute. Gudari plazan hasi eta bukatuko duten ibilbidea Euskadi etorbidetik, Azkuenetik eta Serafin Esnaolatik ere igaroko da.
14:30ean, bertso bazkaria egingo dute Gudari plazako karpan Beñat Gaztelumendi eta Maialen Akizu bertsolariekin. Bazkariko txartelak Maite tabernan eskuratu behar dira, eta hilaren 29a da tiket horiek lortzeko azken eguna.
Helduen menuak 20 euroko prezioa du, eta honakoak sartzen ditu: urdaiazpikoa eta solomoa, txorizoa sagardo erara, bakailao tortilla, saiheskia brasan, gazta, irasagarra eta intxaurrak. Ogia, ura, kupeleko sagardoa eta kafea barne. Haurren menuak, aldiz, 11 euroko kostua du, eta honakoak ditu: makarroiak boloñesa erara, pintxo morunoak, fruta zukua eta txokolatezko browniea. Ogia eta ura barne.
Sabelek bete ondoren, Euskara Eguneko programazioak jarraipena izango du arratsaldean. 17:30ean, Zinema Txikiak hitzordua ezarri du Trintxerpeko Alkateordetzan. Ozzy filma proiektatuko dute. 18:00etan Itzal Erromeriak Gudari plaza girotuko du. Azkenik, 22:00etan, Guatekea izango da karpan.
Trintxerpeko Euskara Egunaren programazioa:
- 11:30: Haurren tailerrak eta jolasak, Gudari plazan.
- 12:00: Muxikoak, Gudari plazan.
- 13:00: Kantu poteoa. Gudari plaza, Euskadi etorbidea, Azkuene, Serafin Esnaola eta Gudari plaza.
- 14:30: Bertso bazkari herrikoia, Gudari plazako karpan. Bertsolariak: Beñat Gaztelumendi eta Maialen Akizu.
- 17:30: Zinema Txikia: Ozzy filma. Trintxerpeko Alkateordetzan.
- 18:00: Itzal Erromeria, Gudari plazako karpan.
- 22:00: Guatekea, Gudari plazako karpan.
