Merka Oiartzun bisitatu dute udaleko ordezkariek eta tokiko eragileek
Aizpea Otaegi alkateak, Leire Mazzior Garapen Ekonomikorako zinegotziak, Eneko del Amo Hirigintza zinegotziak, Oarsoaldeko Garapen Agentzia, Don Bosco LHI eta Ekiherri kooperatibako ordezkariek hartu dute parte bisitan.
Udal ordezkariak zein tokiko hainbat eragileetako kideak Merka Oiartzun gunera egindako bisitan. Argazkia: Herri bizia Euskal herriko arrain banaketarako gunerik garrantzitsuena den Merka Oiartzun bisitatu dute Aizpea Otaegi alkateak, Leire Mazzior Garapen Ekonomikorako zinegotziak, Eneko del Amo Hirigintza zinegotziak, Oarsoaldeko Garapen Agentzia, Don Bosco LHI eta Ekiherri kooperatibako ordezkariek. Errenteria kokatuta dago banaketa gunea, eta arrain salmentan ari diren 20 lantegitik gora eta 100 langile biltzen ditu. 35.000 metro koadroko eremua da.
Proiektuaren xehetasunak ezagutzeko eta sinergia berriak lantzeko baliatu dute bisita: “Proiektuaz eta gizartean izaten ari diren aldaketek sektoreari erakarritako erronka berriez hitz egiteko aukera izan dugu eta Merka Oiartzungo ordezkariek instalazioak modernizatu eta jauzia egitearen garrantzia nabarmen jarri dute. Horretarako, sektoreak dituen erronka handiei erantzuteko bertako eragileak batzea ezinbesteko jo dute”, azaldu du udalak.
Merka Oiartzun hainbat eremutan banatuta dago. 5.000 metro koadro arrandegiei begirako zuzeneko salmentarako dira; 2.000 metro koadro arraina jaso eta banatzeko plataformak hartzen ditu; 2.000 metro kubiko 0 gradutako kamara izozkailua hartzeko bideratuak ditu; 1.000 metro kubiko -25 graduko izozkailu kamara hartzeko; eta 4.000 metro koadro bestelako instalazioetarako.
Instalazioen kokapena ere izan dute hizpide bisitan, “proiektuari sendotasuna eta izaera estrategikoa” ematen diola nabarmen jarri dute.
Sinergiak sortzearen garrantzia azpimarratu du Otaegik, “horretarako, udala bidelagun izango da. Gainera, Oarsoaldeko Plan Estrategikoak jasotzen duen gisan, eskualdean Ekonomia Urdina sustatzea garapenerako lehentasunetako bat da. Bide horretan, Merka Oiartzun bezalako proiektuek paper aktiboa izan behar dute”.
