Pasaiako establezimenduetan, euskara sustatzea helburu
Udalak eta Laurak Bat merkataritza elkarteak euskararen erabilera handitzeko egitasmo bat garatu dute. Merkatari eta ostalariek bezeroekin lehen hitza euskaraz egiteko konpromisoa hartuko dute. Komertzio horiek 'Hasi' bereizgarria eramango dute.
Pasaiako Udalak eta Laurak Bat merkataritza elkarteak herriko merkataritzan eta ostalaritzan euskararen erabilera handitzeko elkarlanean dihardute. Helburu hori lortzeko bidean, establezimenduetan lehen hitza euskaraz egiteak asko laguntzen duela adierazi du udalak. Hori dela eta, “Pasaiako merkatari eta ostalariak gutxienez lehen hitza euskaraz egiteko konpromisoa hartu eta elkarrizketak euskaraz hastera gonbidatu” nahi dituzte.
Lehen hitza euskaraz egiteko konpromisoa hartu duten establezimenduek Hasi hitza daramaten bereizgarriak jarriko dituzte komertzioetan. Bezeroak ere lehen hitz hori euskaraz egitera animatu nahi dituzte udalak eta Laurak Batek.
Lehen hitza euskaraz egiteko konpromisoa hartzen duten Pasaiako establezimendu guztiek har dezakete parte udalak eta merkataritza elkarteak garatutako egitasmoan. Kanpaina horretara batzeko, interesdunak Laurak Batekin edo Pasaiako Udaleko Euskara Sailarekin harremanetan jarri behar dira.
Hasi bereizgarriaz gain, zerbitzu osoan euskara erabiltzeko aukera bermatzen duten establezimenduek Euskal Herrian zabaltzen ari den Euskaraz Barra-Barra e// bereizgarria jartzera animatu dituzte. Aukera hori bermatzeko, komertzioa irekia dagoen bitartean, gutxienez langile bat egon beharko da euskaraz zerbitzua emateko gai dena.
Horrez gain, establezimenduko langile orok, euskal hiztuna izan edo ez, euskara erabiltzen duen bezeroari edota kontsumitzaileari lehen hitza eta azken agurra euskaraz egingo dizkio. Horrela, kontsumitzaileari euskara erabiltzeko aukera bermatuko zaio.
Euskaraz Barra-Barra bereizgarria lortzeko formula bera da, interesdunak Laurak Batekin edo Euskara Sailarekin jarri beharko dira harremanetan.
Liburuxkak
Herritarrei egitasmoaren berri emateko eta establezimenduetan Hasi edo e// ikurrak ikustean nola jokatu behar duten jakiteko, liburuxkak bidaliko zaizkie etxeetako postontzietara. Egitasmoan parte hartu duten establezimenduetan ere beharrezko informazioa topatuko dute pasaitarrek.
Kanpainaren helburu nagusia da “euskara gehiago, gehiagotan eta gehiagorekin” egitea, eta egitasmoarekin merkatariek euskararekiko “jarrera aktiboa” izan dezaten bilatu nahi da, berau sustatzeko.
