Pintxo pote solidarioa Juneren Hegoak elkartearen alde
Gaur eta abenduaren 23an egingo dute pintxo pote solidarioa Juneren Hegoak elkartearen hamargarren urteurrenarekin bat eginda.
Juneren hegoak elkartearen hamargarren urteurrena ospatzeko familia argazkia. Juneren Hegoak elkarteak hamargarren urteurrena ospatzeko ekitaldiak antolatzen ari da urtean zehar. Oraingoan, Errenteria-Oreretako hainbat ostalaritza establezimenduekin elkarlanean pintxo pote solidarioa antolatu du gaurko eta abenduaren 23rako. Gaurko pintxo pote horrekin bat egin duten establezimenduak, honakoak: Aker, Gamon 14, Maite, Ondartxo, Lekuona kantina eta Etxeondo. Horietako batzuk Juneren Hegoak pintxo berezia eskainiko dute.
Elkartearen gaineko informazioa ere zabalduko dute establezimenduek.
Elkarlana ez dela berria nabarmendu du Juneren Hegoak elkarteak, “establezimendu horietako batzuk elkartearekin lankidetzan aritu dira urte hauetan zehar”. Herritarrak animatu ditu parte hartzera: “Arrazoi on batengatik egingo da, bildutako guztia familiei bideratuko zaie”.
Bestalde, 2024 urteko egutegia eta produktu solidarioak salgai izango dituztela gogorarazi du Martin Etxeberria kaleko 15. zenbakian duen egoitzan, hilaren 30ean eta abenduaren 14an, 18:00etatik 19:30era.
59 familia artatu
Juneren Hegoak elkartearen inspirazioa June Sanchez Tolaretxipi izan zen. 2013an hil zen haur minbiziak jota, bi urte zituela. Haren gurasoek eta lagun talde batek handik hilabete gutxira sortu zuten Juneren Hegoak elkartea. Ordutik, Araba, Bizkai eta Gipuzkoan ahultasun egoeran dauden eta gaixotasunak, aniztasun funtzionala edo adingabeen dolua bizitzen ari diren familiak laguntzeko sare bat sortu du elkarteak, eta egoera zaurgarri horietan diren familiei laguntzeko aukera batzuk eskaintzen ditu.
Eratu zutenetik, 59 familia artatu ditu Juneren Hegoak elkarteak, 118 boluntario pasa dira antolaketatik, 86 ekitaldi egin ditu, eta 287.000 eurotik gora bideratu ditu bere jarduerara. 2020an gainera, onura publikoko izaera aitortu zion Eusko Jaurlaritzak elkarteari.
Juneren Hegoak elkartea lagundu nahi dutenek hauetako bideren bat erabil dezakete: Boluntario egin nahi dutenei, posta elektroniko helbide honetara idazteko eskatu diete; hilero euro baten trukez Teamer izateko berriz, hemen sakatu. Dohaintza egiteko aukera ere badago (horretarako klik egin hemen). Juneren Hegoak elkartearen laguntzaile izateko aukera ere eskaintzen du elkarteak.
Horretaz gain, Sabadell banketxeko ES81 0081 4254 46 0001112822 kontu korrontean egin daiteke ekarpena, baita Bizum bidez ere 03930 kodea erabilita, edota dohaintzak sailean Juneren Hegoak bilatuta.
