Oiarperen asteburuko partiden kartelera (2023-11-24)
Oiarpeko pilotariek 21 norgehiagoka jokatuko dituzte asteburuan. Zazpi partida jokatuko dituzte Madalensoron.
Madalensoron zazpi partida jokatuko dituzte gaur eta bihar. Oiarpeko pilotariek 21 partidako kartelera izango dute asteburuan. Horietako zazpi etxean jokatuko dituzte, lau gaur arratsaldean eta gainontzeko hirurak bihar arratsaldean.
Madalensoroko gaurko partidak 18:00etan hasiko dira, eta guztiak lehen fasetakoak izango dira. Biharko norgehiagokak 17:00etan hasiko dira, eta horietako bi azken fasekoak izango dira.
Gainontzeko partidei dagokienez, nabarmenenak igandean jokatuko dituzte, Sopelan. Baserria 0 Km. txapelketako final zortzirenetan Oiartzungo bi ordezkari arituko dira nor baino nor.
Alde batetik, Zelaiaran oiartzuarrak —Etxeberriarekin batera— Perurena eta Olano tolosarren kontra bilatuko du fasez pasatzeko txartela. Bestetik, Caetano —Iradirekin bikotea osatuta— Paraguayo naiararraren eta Artetxe azpeitiarraren kontra arituko da. Gaztetxoen mailako partidak izango dira biak ala biak.
Kartelera osoa ikusteko, egin klik esteka honetan.
