Zaintza lanekoak ere Azaroaren 30eko grebarekin bat
Azaroaren 30eko grebarekin lotuta, zaintzaren harira elkarretaratzea egin dute gaur Udal Gizarte Zerbitzuetako egoitzaren parean.
Zaintzaren pribatizazioaren aurka elkarretaratu dira gaur. Azaroaren 30eko grebarekin lotuta, zaintzaren harira elkarretaratzea egin dute gaur Udal Gizarte Zerbitzuetako egoitzaren parean. Zaintza lanak ezinbestekoak direla esan dute bildutakoek, eta zehazki adinekoen egoitzetan, eta etxez etxeko zerbitzuan bizi duten egoera jarri dute jomugan. Egun, egoera jasangaitza bizitzen ari dira, langile gutxi eta lanez gainezka daude; langileak ez omen daude egoera onean. Horregatik bildu dira gaurkoan zaintzarako eskubide kolektibo baten alde egiteko.
Rebeca Mesa etxez etxeko udal zerbitzuko langilea da, berak azpikontratatutako enpresa pribatu bateko langilea da. Eskaintzen duten zerbitzua publikoa izatea galdegin du, tartean enpresa pribaturik gabe, denek maila berean lan egin dezaten baldintza duinekin. Izan ere, “enpresa bat tartean sartzen denean, gure lana ezegonkortzen da”.
Mesa lanean ari den enpresan 60 langile inguru ari dira, eta etxez etxeko zerbitzu publiko beraren barruan badira funtzionarioak, “geroz eta gutxiago gelditzen dira, erretiroa hartzen duten neurrian postua desagertzen doalako”. Mesa lanean ari den enpresa horretaz gain, Errenteria-Oreretan hiru enpresa pribatu gehiago daude etxez etxeko zerbitzua emateko Oarsoaldeko lau herrietan, “hortaz, lana badago”.
Eskaintzen duten zerbitzua agerikoagoa izan beharko lukeela uste du: “Etxez etxeko laguntzaren sektorea oso sektore ikusezina da. Guk ez daukagu adinekoekin tratatzeko egoitzarik, baina eskaintzen dugun arreta handiagoa da; beraien etxeetara hurbildu eta mimo eta dedikazio handiagoarekin esku hartzen dugu.”
Esparru batean, Mesa zorpekodun sentitzen da. Beste askok ez bezala, berak lanaldi osoan egiten duelako. “Eguneko 5 etxe dauzkat eta, eta egunero ez ditut etxe berak. Denboraren kudeaketa ere beste arazoetako bat da, denbora faltan ibiltzen garelako etxe batetik besterako ibilbidean”. Era berean, adineko horien agendara egokitu behar izaten dira, eta egunen batean, bakarren batek huts egin ezkero, ordu solteak izan ditzakete. Hortaz, soldata ere ez da finkoa izaten. “Enpresak lan-egutegia ondo antolatu beharko luke, lanaldi osoan lan egin eta soldata finkoa izan dezagun”.
Rosa Enriquezek ere bat egin du gaurko elkarretaratzearekin; adinekoen egoitza bateko langilea da bera. Mesak bezala, kalitatezko zaintza zerbitzu bat eskatzen du: “Erabiltzaileen beharretara moldatuko diren ratioak ezartzea eskatzen dugu, oraingo ratioak lotsagarriak direlako. Esaterako, pazienteak ohetik altxatzeko 25 minutu ditugu, eta langile bakoitzak 8-9 paziente ditu”.
Gaurko salaketa elkarretaratzean, soldata duinak eta pazienteen beharren aitortza eskatzeaz gain, horien eskubideak ere mahai gaineratu dituzte, “hemen eskatzen ari garena, egungo langile eta erabiltzaileengatik egiten dugu, baina baita etorkizuneko langile eta erabiltzaileengatik ere; finean, denoi egokituko zaigu uneren batean zainduak izatea”, esan du Enriquezek.
