Jaizkibel herritarrentzat izan behar dela aldarrikatu dute berriz ere
Atzo goizean egin zuten Lezoko herrigunetik Jaizkibelgo eremu militarrerako martxa. Gerren negozioa salatu zuten.
Jaizkibel herritarrena, eta ez militarrena dela aldarrikatzeko martxa egin zuten atzo goizean. Gurutze Santuaren plazatik abiatu ziren mendi aldera, eta han, jada 11:00ak inguru zirela, eremu militarraren ondo-ondoan elkarretaratzea egin zuten. Antolatzaileek jakinarazi dute 30 bat lagun bildu zirela mobilizazioan. Aldi berean, gerrak “batzuentzako negozio” direla adierazteko baliatu zuten martxa.
Jada eremuaren atarian zirela, bertsoetarako tartea hartu zuten. Honakoak dira bildutakoek kantatu zituztenak:
Pinuz bortxaz jositako
beste mendi bat gurea,
pribatizazioarekin
hustuz gure lurraldea.
Horrez gain, Espainia da
lur zabal baten jabea,
bertan gerraren hauspoa
entrenatzeko gunea.
Inperialismo gordinak
betetzen denon bideak,
indartuz patriarkatu
betikoen boterea.
Bertako hamaika tirok
oihartzuna urrunean.
Gure lurrak ta mundua
miseriakin beteaz
Ez dugu nahi militarrik,
ez jabetza pribaturik.
Geure mendi ta gorputzak
dituztelako bahiturik.
Herriarentzat nahi dugu
gure mendia osorik,
bere haritz eta txillar,
bere osin ta amezti.
Ez hemen ez eta inon
ez dugu nahi militarrik,
hilketarako zelairik,
ez eta gerra gordinik.
Zapaldutako lur urrun
guztiak ezin bizirik,
eta gure etxe hontan
ez dugu nahi konplizerik!
