PSE-EE: "Neurri prebentibo eta zuzentzaileak hartzea ezinbestekoa da"
Errenteriako PSE-EEk kezka azaldu du gertakariaren gainean, eta prentsa oharra bideratu du komunikabideetara, salatu duenez, "Errenteriako hainbat gazteri ere eragin dielako gertakariak".
Gipuzkoako 10 eta 17 urte arteko 1.000 ikasletik gora sartu dituzte irudi pornografikoak, mezu homofoboak, matxistak eta faxistak zabaltzen dituzten bi whatsapp taldeetan. Gertakaria ikertzen ari dira, hainbat ikastetxeetako zuzendariek salaketak aurkeztu ostean.
Errenteriako PSE-EEk kezka azaldu du gertakariaren gainean, eta prentsa oharra bideratu du komunikabideetara, salatu duenez, “Errenteriako hainbat gazteri ere eragin dielako gertakariak”.
Hala, Errenteriako Udalari “esku-hartu” eta “berehalakoan neurri eraginkorrak” hartzeko eskatu dio alderdi sozialistak, “arazoak gure nerabeei eragiten dielako baita haien integritateari ere zuzen-zuzenean. Egoerari aurre egiteko beharrezko bitartekoak ikastetxe eta gurasoen eskura jar ditzan eskatzen diogu udalari”.
Horrekin hainbat neurri ezartzeko eskatu du, epe laburrekoak zein epe luzekoak. Laburrekoen barruan, sentsibilizazio eta prebentzio neurriak inplementatzea eskatu du, “sare sozialen erabilera arduratsua sustatuko dutenak”. Halaber, bestelako eragileekin, Eusko Jaurlaritza eta Gipuzkoako Foru Aldundiarekin elkarlanean aritzeko ere eskatu dute sozialistek, “erantzun integrala emateko”. Epe laburreko beste neurri bat ere planteatu dute: “segurtasun indarrekin elkarlanean aritzea, zabalkundearen arduradunak identifikatu eta adin txikikoak babesteko”.
Epe luzera berriz, estrategia integrala planteatu du alderdi sozialistak, “hezkuntza komunitate osoa inplikatuko duena, hezitzaile, gurasoak eta adin txikikoak beraiek barne hartuko dituena, ingurune digital segurua eta arduratsua sustatzeko”.
