Zinema Txikiak hitzordu bikoitza proposatu du larunbaterako
Alde batetik, 'Ozzy' filma proiektatuko da Trintxerpeko Alkateordetzan. Bestetik, 'Tarzan' pelikula botako dute Pasai Antxoko Kultur Etxean. Bi saioak 17:30ean hasiko dira.
Pasaiako Zinema Txikiak hitzordu bikoitza proposatu du larunbaterako (abenduak 2). Alde batetik, Ozzy filma proiektatuko da Trintxerpeko Alkateordetzan, Trintxerpeko Korkoiburuek antolatutako Euskaren Egunaren programazioaren barruan. Bestetik, Tarzan pelikula botako dute Pasai Antxoko Kultur Etxean. Bi saioak 17:30ean hasiko dira, eta sarrerak hartu daitezke jada.
Ozzy Karmengo Ama ikastetxeko LH2 eta LH3ko ikasleek aukeratutako filma da. Tarzan, aldiz, La Anunciata ikastetxeko LH2 eta LH3koek hautatu dute.
Horrez gain hainbat arau bete behar direla adierazi dute antolatzaileek. Hona hemen:
- Kultur aretoetan jartzen diren informazio karteletan jasotako argibideak bete behar dira.
- Aretoan ezin da ez janaririk eta edaririk sartu.
- Segurtasun neurriak direla-eta, aforoa betetzen denean ez da inor gehiago sartuko.
- Haurrak arduradun batekin joan beharko dira, baina, haurrei zuzendutako ekintzak direnez, lehentasuna haiei emango zaie.
- Saioek 90 minutu inguru iraungo dute gehienez. Saioa bukatzean, irteeran egotea komeni da haurrak jasotzeko.
- Seme-alaba txikiegia bada, eta saioa jarraituko ez duela ikusten bada, ez ekarri. Iritsiko zaio emanaldiak ikusteko garaia.
