Adimen artifizialari euskara 'irakasteko' saioa, larunbatean
Herritarren parte hartzea bilatuko dute, adimen artifizialari euskara irakasteko. Goizean saioa egingo dute, udaletxean. Etxetik ere parte har daiteke.
Bihar hasiko da Euskararen Astea Oiartzunen, Dardara filmaren emanaldiarekin. Hortik aurrera, beste zortzi jarduera antolatu dituzte, elkarrekiko oso ezberdinak, baina guztiek euskara ardatz dutela.
Horrela, datorren larunbatean, abenduak 2, adimen artifizialari euskara irakasteko saioa egingo dute, goizean zehar. Herritarrak gonbidatu dituzte bertan parte hartzera, guztien ekarpena beharrezkoa delakoan.
“Mundu digitalak zein garrantzi duen eta izango duen jakitun, euskarak eta euskaldunok badugu erronka polita aurretik”, adierazi dute antolatzaileek. Software librearen bidez erakutsiko diote euskaraz adimen artifizialari.
Udal pleno aretotik pasatu beharko da ahots bidezko ekarpena egitera. Goizez 10:00etatik 13:30era bitartean izango da horretarako aukera, eta arratsaldean, 17:00etatik 19:00etara.
Aurretik —edota ondoren— etxean landu nahi duenak, Gaitu proiektuaren webgunean du horretarako aukera.
Euskararen Asteko egitaraua kontsultatzeko, berriz, hemen egin behar da klik.
