'Gabon magikoak', magia eta musika uztartuko dituen ikuskizuna
Oraingoan ere, proposamen originala egin du EMKE Musika Bandak, eta magia eta musika uztartuko dituen emanaldia antolatu du hilaren 17rako.
Emanaldiaren berri emateko agerraldia. Argazkia: Herri Bizia Etengabe berrasmatzen ari da bere burua EMKE Musika Banda, proposamen berri eta berritzaileak ondu eta publiko zabalari eskaintzeko, ausart. Oraingoan ere, proposamen originala egin du, eta magia eta musika uztartuko dituen emanaldia antolatu du hilaren 17rako.
Errenteriako Musika Bandako musikariak, lau magorekin ariko dira oholtza gainean Lekuona auditorioan: Marsel Magoa, Peio Rivas, Javier Agirre, eta Eriz Magoa ariko dira. Guztiak zuzentzen, berriz, Aitor Mitxelena Rubio.
EMKEk nabarmen jarri du denbora luzea daramala haurrentzat espresuki diseinatutako proiektuak eskaintzen, “hamabost ekitalditik gora egin ditugu Gabonei lotuta haurrei begira. Guztiak kalitate handikoak dira, eta musika, arte eszeniko ezberdinak uztartu ditu horretarako, formatu desberdinekin konbinatuz”. Oraingo ikuskizun berezi horretan, aurrekoetan bezala, musika izango da formatu eta diziplina ezberdinei ateak zabalduko dizkiona.
Klasiko handien konposizioak, soinu bandak eta soularen klasikoen konposizio eta kantuak uztartuko ditu musika bandak hilaren 17ko kontzertuan eta horri magiaren bidaia fantastikoa uztartu, “bertaratutako guztiak txundituko dituen fantasia kontzertua izango da”.
Lekuona Fabrikaren auditorioan izango da kontzertua, 19:00etan, eta sarrerak gaur bertan jarriko dituzte salgai, 5 euroan, Lekuona Fabrikan bertan edota online.
