Bi urteko lanen ondoren, bihar, festa Ibai Ondon
Auzolanean egindako bi urteko berrikuntza lanen ondoren berriz ere zabalduko dute herrigintzari bideratutako eraikina.
Ibai Ondo eraikina berregokitzeko lanek bi urte iraun dute. Horiek ia-ia bukatu dituztela jakinarazi dute. Hartara, egoitza berritua erabat txukun uzteko, herriari nola gelditu den ezagutarazteko, eta herri giroan lanen bukaera ospatzeko festa egingo dute bihar (larunbata) Ibai Ondon bertan.
Hasteko, 09:00etan, eraikina erabat garbi uzteko auzolanarekin hasiko dira. 12:00etan dena txukun-txukun dela, ate irekien jarduera egingo dute herriko eraikin ezagunaren barrualdea nola gelditu den ezagutarazteko. 14:00etan, berriz, aro berriko lehen herri bazkaria jasoko du edifizioak; txartelak Tiñelun eros daitezke. Eta eguna bukatzeko, 17:00etan, Traband taldearen emanaldia Ibai Ondoko sotoan.
Historia
1997eko apirilean Tiñelu Elkarteak erosi zuen Ibai Ondo, “Lezon herrigintzarako erabiltzeko helburuarekin”, bertako kideek adierazi dutenez. Ondoren, 2000. urtean, Espainiako Auzitegi Nazionalak Herriko tabernen auziaren harira enbargatu egin zuen, eta urte luzez izan zen egoera horretan. Gaur egun enbargo horretatik libre dago.
“Pandemia aurretik hausnarketa bat burutu genuen eta berriro herrigintzari eta Lezoko herriari bideratutako azpiegitura izan behar zuela erabaki genuen. 2022ko urtarrilaren 19an hasi genituen berrikuntzak, eta auzo lanean etxea goitik behera konpondu dugu”, zehaztu dute: “Ez dugu krediturik eskatu: herri bazkari eta afariak, txosnak, bazkideek eta etxearen erabiltzaileek jarritako diruarekin ordaindu dugu konponketa guztia”.
Gaur egun etxea, Tiñeluko bazkideez gain, Emakume Taldeak, Piztu Lezok, Mañontzik, Gure Eskuk, Txirbillak, Sarek, Etxetxo Lezoko Memoriaren Historikoaren Taldeak, Iratzerrik, EH bilduk, Sortuk, Zeorri! aldizkariak, eta beste hainbat eragilek erabiltzen dute. Bestetik, herriko taldeek antolatutako bazkari, afari, txaranga eta musika entseguak nahiz soinketa taldearen saioak ere burutzen dira, besteak beste, eraikinean. “Helburua horretan jarraitzea da. Ibai Ondo Lezon herrigintzako tresna bat izatea da, Lezoko herriari bizitza ematen jarraitzeko”.
