87 postu eta giro bikaina, Txerri Egunerako osagaiak
Txerri Egunaren egitaraua aurkeztu dute festaren antolatzaileek. Goizean zehar ekitaldiak egingo dituzte Madalensoron eta plazan.
Madalensoron hamarnaka postu jarriko dituzte, baita Elizalde ikastetxean ere. Eguberrietako festak modu ez-ofizialean hasteko pistola-hotsa izan ohi da Txerri Eguna. Gainean da, datorren larunbatean —hilak 16— izango baita. Antolatzaileek egitarauaren berri eman dute, eta giro onez beteko ditu Madalensoro zein Elizalde Herri Eskolako pilotalekuak eta plaza ingurua.
Madalensoro eta ikastetxeko frontoietan hartuko dute ostatu 84 artisau eta sortzaileren postuek. Gainera, jan eta edanetarako beste hiru txosna jarriko dituztela iragarri dute.
Ttur-ttur Euskaltzaleon Bilguneak, Intxixu-AEK euskaltegiak, Haurtzaro Ikastolak, Elizalde Herri Eskolak eta Oiartzok antolatzen dute Txerri Eguna, udala eta Erretxiki pentsu eta landare enpresarekin batera.
Egitaraua
- 10:00etatik 14:00etara: Artisau eta ganadu feria, Madalensoron eta Elizalde Herri Eskolan.
- 12:00etan: Erraldoi txikien kale buelta, herriko plazatik abiatuta.
- 12:10ean: Mutxikoak, Done Eztebe plazan.
- 12:30ean: Herriko ikastetxeetako dantza emanaldiak, bi guneetan.
