Sanjuandarren San Tomas eguna, igandean
Itsas Mendik antolatuta, igandean ospatuko dute eguna Donibanen. Trikitilariak, azoka, konpota erakustaldia, kantaldia, dantza emanaldia eta euskal produktuen zozketa, igandeko osagaiak.
Donibaneko San Tomaseko azoka, artxiboko irudia. San Tomas eguneko ospakizunak hilaren 21ean izaten badira ere, sanjuandarrek aurre hartuko diote egun horri, igande honetan ospatuko baitute Donibaneko San Tomas eguna, Itsas Mendi Elkarteak antolatuta.
Sanjuandarrak 11:00etan jarriko dira martxan Santiago plazan trikitilariekin, azokaren hasierarekin eta konpota erakustaldiarekin. 12:00etan, Pasaia-Lezo Lizeoko ikasleek kantaldia eskainiko dute. Kantaldiaren ondoren, Lintxua dantza taldearen emanaldiaren txanda izango da. 14:00etan, aldiz, euskal produktuen zozketa egingo dute.
Azokan zehar, talo eta txistorra postua girotuko dute trikitilariek. Hona hemen azokaren parte hartzaileak: Xatur Telletxea (makilak), Maridomingi (eskulanak), Aritzkurengo Tienduka (kosmetika), Eneko Sein (jakiak), Gaztelutxo baserria (barazkiak), Maixus (gantxilozko panpinak), Maitane Andueza (makrame eta alpakazko pitxiak), Joxe Ramon Etxabe (gaztagilea), Leire Dorronsoro (makrame eta pitxiak), Liss (idazlanak eta lorez egindako koadroak) eta Itsaso (serigrafia).
