Abenduaren 23an, Olentzerok haurren gutunak jasoko ditu
Hogeita bat urte dira jada Lau Haizetara elkarteak Mari Domingi eta Olentzeroren komitiba egitea erabaki zuenetik. 17:30ean abiatuko dira.
Datorren abenduaren 23an, larunbatean, Lau Haizetara Euskaltzaleon Topaguneak antolatutako Olentzero eta Mari Domingiren komitiba iritsiko da herrira.
17:00etan harrera egingo diete Madalenaren ermitan eta erdiguneko kaleak zeharkatu ondoren (Madalena kaletik, udaletxetik, Foru kaletik, Xabier Olaskoaga plazatik edota Biteritik igaroko da), 18:30ean helduko dira Herriko Plazara. Bertan, haur eta gazteenen gutunak jasoko dituzte. Era berean, haurrek biekin hitz egiteko eta urte berrirako desio eta eskakizunak egiteko aukera izango dute ere une horretan.
Hala eta guztiz ere, eguraldi txarra egingo balu ekitaldia Koldo Mitxelenako aterpera mugituko dute antolatzaileek.
Herriko Plazan, gutunak jaso bitartean, antolatzaileek gaztaina erreak eskainiko dizkiete herritarrei. Bestela, egun bereko eguerdian, 12:00etan, Lau Haizetarak haurrentzako tailerra antolatuko du egoitzan bertan.
Euskararen erabilera
Lau Haizetarako kideek kezka berezia dute euskararen erabilerarekin. Herriko kaleetan hizkuntza bizirik nahi dute, eta horretarako euskaraz dakitenei dei egin diete erabil dezaten. Olentzeroren eta Mari Domingiren jardueran ere horrela izatea nahi dute. “Orain egiten ez duguna, bihar malkoek ez dute zuzenduko”, esan dute elkartekideek.
