Argazki inauterizaleen erakusketa antolatuko dute
Herritarren argazkiak jasoko ditu Inauterietako Batzordeak urtarrilaren 14ra arte, eta otsailean Xenpelar Etxean erakusketa egingo dute.
Aurten ere argazki erraldoia egingo dute Herriko Plazan. Inauterietako Batzordeak, estreinakoz, herritarren argazki inauterizaleekin erakusketa antolatuko du. Otsailaren 8tik 17ra, Xenpelar Etxean urteetan zehar Errenteriako inauteriak direnaren iruditegia jasoko dute. Horrela, Inauterietako Batzordeak herritarrek etxean gordeta dituzten argazkiak bidaltzera animatu ditu.
Ahalik eta irudi anitzena eskaini ahal izateko, herritar bakoitzak bost argazki aurkezteko aukera izango du, eta erakusketarako garai eta gai desberdinen arteko oreka bermatzen saiatuko dira.
Herritarrek helbide elektroniko honetara bidaliko dituzte erretratuak, oinarrizko informazioarekin (egilea, data eta gaia). Argazkiak bidaltzeko epea hilabetez luzatuko dute, urtarrilaren 14ra arte. Argazkiak presentzialki aurkezteko aukera egongo da ere: urtarrilaren 8tik 12ra, goizez udaletxeko artxiboan (09:00etatik 13:00era) edo arratsaldez Xenpelar etxean (17:00etatik 20:00etara).
