Oskarbik kontzertua emango du Xanisteban Egunean
Donostiako Orkestra Barrokoarekin batera arituko dira Landetxen, hilaren 26an. Hiru zatitan banatuko dute kontzertua; bakoitza bere aldetik, lehendabizi, eta elkarrekin, gero.
Oskarbi eta Donostiako Orkestra Barrokoa elkarrekin arituko dira. Xanisteban Egunerako kontzertua programatu dute Landetxe aretoan. Hilaren 26an, Oskarbi taldea eta Donostiako Orkestra Barrokoa igoko dira oholtzara, 19:30etik aurrera. Hiru zatitan banatuko da kontzertuaren egitaraua. Lehenik eta behin, Donostiako Orkestra Barrokoa aterako da, bere errepertorioa jotzera. 1974an sortu zen hiriburuan, eta musika klasikoa —bereziki barrokoa— landu dute beraien ibilbidean. Orkestratik zuzendari eta musikari asko pasatu dira ia mende erdian, eta horietako asko sona handikoak izan dira. Gaur egungo zuzendaria Sergio Zapirain errenteriarra da.
Ondoren, Oskarbi taldekoen txanda izango da. Oarsoaldean sortu zen, 1966an. Ez Dok Amairuko partaide izan zen lau urtez, 1968. eta 1972. urteen artean. Ia sei hamarkadako ibilbidean hamabi disko plazaratu dituzte, eta berriena duela bi urte argitaratu zuten, Kantua zuei izenekoa. Azken urteetan Euskal Herriko abesbatza ugarirekin kontzertuak eman dituzte, eta orain, estreinako aldiz, orkestra batekin partekatuko dituzte haien kantuak Landetxen.
Zortzi lagunek osatzen dute Oskarbi: bost ahots, gitarra, flauta, biolina eta pianoa. Honakoa da kantatuko duten errepertorioa: Trinidadeak, Guek ajutu ez dugu, Tiriki-tauki, Defuntuen egunean, Artazuriketa (Antton Valverde batuko zaie) eta Globo gorri.
Hirugarren zatian elkarrekin igoko dira bi taldeak, bost kanta abesteko: Aitak eta amak, Mariñela, Perutxorena, Eguberriaren jitiaz eta Mendira naiz. Sarrerak salgai daude, 8 euroren truke, eta webgune honetan eros daitezke.
