"Eutsiezina da Gazako egoera"
Orereta Palestinarekin Herri dinamikak deituta, elkarretaratzea egin zuten ostiral arratsean Zumardian.
Ostiraleko elkarretaratzearen une bat. Argazkia: Arkaitz Anza. Orereta Palestinarekin Herri dinamikak deituta, elkarretaratzea egin zuten ostiral arratsean Zumardian. “Eutsiezina da Gazako egoera”, salatu zuen. Lurrean hilotzak, manta zuriz estaliak, odolarekin. “Israelek gaur-gaurkoz 18.025 palestinar hil ditu urriaren 7tik Gazako zerrendan. Zaurituak 49.645 dira. Bukatu dadila Palestinaren aurkako genozidioa”, esan zuten.
Deitzaileek nabarmendu zutenez, genozidioa buka dadin, ordea, ezinbestekotzat eman zuten Palestinako Estatua eta palestinarren herri izaeraren aitortza, nahiz haien aldarrikapenak errespetatzea: “Ezinbestekoa da kolonialismoa eta apartheida bukatzea. 1948an lapurtzen hasiz iren eta gaur egun lapurtzen jarraitzen duten lurrak Palestinako herriari itzultzea”.
Deia egin zieten herritarrei “beste alde batera” ez begiratzeko, “gure esku dago gutxienez estatu sionistari boikota egitea. Pentsa daiteke txikikeria dela, baina ikaragarria da boikotagatik eragindako kaltea, uste duguna baino eraginkorragoa”. Hala, Israelek “aurpegia garbitzeko publizitate kanpainetan” dirutza gastatzen duela ziurtatu zuten, “baina estatu genozida, hiltzailea, basatia dela zabaldu dezagun”.
Palestinako ikur eta banderak leihoetan jartzera deitu zituzten herritarrak, eta haien alde antolatuko direnetan parte hartzera.
