Legorburuk lau sari jaso ditu asteburu berean
Oihenart aforismo lehiaketa irabazteaz gain, Errenteria-Oreretan eta Hondarribian aipamenak lortu ditu errenteriarrak.
Oihenart aforismo lehiaketako irabazleak: Juan Ramon Alberdi azkoitiarra (bigarren saria) eta Iñigo Legorburu. Iñigo Legorburuk asteburu emankorra izan du: lau sari jaso ditu errenteriarrak. XI. Oihenart Aforismo Lehiaketaren sari nagusia lortu du. EHUko Donostiako Hezkuntza, Filosofia eta Antropologia Fakultateak (HEFAk), Joxe Azurmendi Katedra eta Donostiako Euskara Zerbitzuak elkarlanean antolatzen dute.
Hirugarren aldiz irabazi du Legorburuk. Aurten araua jarri diete: Joxe Azurmendiren esaldi bat izan da abiapuntua: Entzutea, arimako jarrera sakon bat da.
Legorbururen aforismo sortak Ardi-men artifiziala du izena. 50 aforismo jaso ditu. “Jokorako eta jolaserako beta eskeintzea izan du helburu nire lanak, irakurleak une atsegin bat pasa eta ahal bada, irribarre bat ateratzeko asmoarekin”, azaldu du egileak.
Aforismoak aintzatetsi ditu Oihenart lehiaketako garaileak. “Presazko eta hitz gutxitan asko esatea eskatzen duen gizarte honetan, aforismoa tresna ederra da ideia batzuk zalantzan jarri zein beste pentsamendu batzuk helarazteko”.
Bere lanagatik 500 euroko diru-saria lortu du. Aurretik beste hainbat idazle ezagunek irabazi dute, Bixente Serrano-Izko, Maribel Aiertza eta Koldo Izagirre idazleak edo Maialen Akizu eta Ekaitz Goikoetxea bertsolariak kasu.
Hiru sari, larunbatean
Sari hori ostiralean jaso zuen. Larunbatean beste hiru sari jaso zituen, hiru generotan: narratiba, poesia eta bertso-paperak. Errenteria-Oreretan —jaioterrian— bi jaso zituen.
Zapirain bertso-paper lehiaketan Kuadrillategi bertso-sortarekin bigarren saria lortu zuen. Honakoa izan du hizpide: “Gure kuadrilla ustez progre eta aurrerakoietan ematen den rol banaketak ditut hizpide, hala nola haurren zaintza edo gizonezkook guretzat soilik hartzen dugun denbora kirola egiteko garaian”. Arkaitz Oiartzabal Xamoa oiartzuarra gailendu zen bertan.
Ereintza elkartearen ipuin-lehiaketan Joxan Arbelaitz Saria lortu du. Begiradak lanarekin irabazi du; aiton-amona bikote baten gorabeherak izan ditu hizpide.
Hirugarren saria Hondarribiko Satarka poesia lehiaketan lortu zuen. Bigarren saria eskuratu du, Bizitza den soinu-banda lanarekin. Lana egiteko bere bizitzako soinu-banda diren abestien zatiak hartu ditu.
