Xabier Lete gogorarazteko ekitaldi sorta, asteburuan
Leteren bizitzari eta obrari buruzko bi bideo-elkarrizketa ikusgai izango dira asteburuan, udaletxean. Igandean, eskulturaren inaugurazioa eta oratorioa.
'Lete' eskultura inauguratuko dute asteburuan, besteak beste. Apirilaren 5ean beteko dira 80 urte Xabier Lete Bergaretxe jaio zela. Efemeride biribileko urtea hasi berri den honetan, Lete zena gogoan izango dute. Datorren astebururako hainbat ekitaldi antolatu dituzte.
Ostiral arratsaldean (hilak 12), zein larunbat eta igande goizetan, Leteri buruzko bi bideo-elkarrizketa proiektatuko dituzte udaletxeko pleno aretoan. Ostiralean 17:00etatik 20:00etara ikusi ahal izango da, eta beste bi egunetan, 10:00etatik 13:00etara. Ikusleak nahi bezala arituko dira sartu-irtenean.
Bi bideoek gai bana jorratuko dute. Alde batetik, Leteren bizitza, haren arreba Arantzak kontatuta. Bestetik, lan artistikoaz aritu da Joxe Angel Irigarai poeta.
Igandean, beste bi zita
Igande arratsalderako (hilak 14), bi zita jarri dituzte. Landetxen izango dira biak. Izan ere, Lete han bertan zegoen etxean jaio zen Lete.
Pasa den urtean Lete eskultura jarri zuten sarreraren ondoan, eta hori inauguratzeko ekitaldia egingo dute igandean, 18:30ean. Horren ondoren, 19:00etan, Hesia urraturik oratorio sinfoniko-korala eskainiko dute. Joxan Goikoetxeak sortu zuen, Leteren heriotzaren 10. urteurrenerako (duela lau). Sarrerak agortuta daude.
“Herritarrengana hurbildu nahi dugu herriko idazle, poeta eta kantari estimatuak euskal kulturan utzitako aztarna”, adierazi du Oiartzungo Udalak.
