[Erreportajea] Pasaiako Zinema Txikia, egitasmo handia
Urteko lehen emanaldia jasoko du bihar arratsaldean Donibaneko Juanba Berasategi aretoak. Saio guztietan bezala, doako motora zerbitzua izango dute haur eta guraso pasaitarrek.
Joan den urteko emanaldi batean ateratako irudia da honakoa. Pasaiako haur eta gurasoak adi egon daitezela, bueltan baita Zinema Txikia. Urteko lehen emanaldia egingo dute bihar Donibaneko Juanba Berasategi aretoan. Tom eta Jerry filma proiektatuko dute (17:30ean), noski, euskara hutsean. Antolatzaileak ziur dira, saio guztietan bezalaxe, lepo beteko dela aretoa. Hortaz, gonbidapenak azkar batean hartzeko eskatu die lau barrutietako bizilagunei antolatzaile lanetan dabilen Iñigo Ortega Martinez antxotarrak.
Orain dela sei urte abiatutako egitasmoa da, eta jada errotutakoa dela erakutsi dute pasaitarrek. «Nire bi seme-alabek ez dute ulertzen Zinema Txikirik gabeko ikasturte bat. Galdu ezin duten hitzordua da. Askok egitaraua hozkailuan dute zintzilik», esan du harro, Ortegak. Zinema Txikia, handia da beraz.
Ortegak atzera bota du begirada, eta hastapenak gogoratu ditu. «Gazte batzuk hasi ziren antolatzen. Gogoan zuten txikiak zirenean horrelako zerbait zutela herrian, eta hori berreskuratzeko asmoarekin hasi ziren lanean». Gazte talde horretara batu ziren gurasoak berehala, euskarazko aisialdian «hutsune» bat ikusi baitzuten haiek ere. «Euskarazko ikus-entzunezkoen eskaintza urria da. Eskaintza publiko bat egin nahi izan dugu urte hauetan, betiere irizpide berbera izanda: euskaraz izatea eta bertako ekoizpenak lehenestea». Formula horrek sekulako arrakasta izan duela aitortu du, pozik. «Ez dugu Zinema Txikia Warner batean bilakatu nahi. Ez da ohiko zinema areto bat, eta ez ditugu kultura eta kontsumoa elkartu nahi», erantsi du.
Emanaldia Donibanen izan arren, gainerako barrutietako bizilagunek ez dute hitzordua galtzeko aitzakiarik. Izan ere, doako motora zerbitzu berezia eskaintzen diete Antxo, Trintxerpe eta San Pedroko herritarrei. «Trintxerpeko pantalanean biltzen gara 17:00etan, elkarrekin Donibanera joateko. Giro euskaldun batean aritzen gara. Oso giro polita eta magikoa sortzen da. Desberdina baita herria itsasotik ikustea. Badia benetan elkartzen gaituen plaza dela sentitzen dugu emanaldira joatean eta itzultzean, eta ederra da hori».
Motorarako zein emanaldirako txartelak atari honetan eskura daitezke.
