Xabier Lete omendu dute jaioterrian, hainbat ekitaldirekin
Diziplina anitzetan aritu zen sortzaileak 80 urte beteko lituzke aurten. Leteren omenezko eskultura inauguratu dute, besteak beste.
Arantza Lete, Iosune Cousillas, Joana Mendiburu eta Eneko Salaberria, atzoko ekitaldian. Apirilaren 5ean beteko 80 urte Xabier Lete diziplina anitzeko sortzaile eta artista jaio zela. Horren harira, bere jaioterrian, Oiartzunen, ekitaldi batzuk egin dituzte pasa den asteburuan. Lete omentzea eta haren lanari aitortza egitea izan da helburua.
Ostiral, larunbat eta igandean udaletxetik pasa ahal izan da, Lete ardatz duten bi bideo-elkarrizketa ikusteko. Batean Arantza Lete arrebak hitz egiten zuen haren bizitzari buruz, eta bestean, Joxe NAgel Irigaraik hizpide zuen bere obra.
Ekitaldi nagusia atzo —igandea— izan zen. Joxan Goikoetxeak Leteren heriotzaren hamargarren urteurrenerako sortutako Hesia urraturik oratorio sinfoniko-koralak Landetxeko eserleku guztiak bete zituen.
Eskulturaren inaugurazioa
Ikuskizunaren aurretik, Lete eskulturaren inaugurazio ekitaldia egin zuten. Duela hilabete batzuk jarri zuten, eta orain inauguratu dute, urteurren biribilean.
Bertan izan ziren Arantza Lete Xabierren arreba, Joana Mendiburu alkatea, Iosune Cousillas Kultura zinegotzi ohia eta Eneko Salaberria, eskulturaren egilea.
Mendiburuk adierazi zuenean, atzoko eguna baliatu nahi izan zuten eskultura ezagutarazteko. “Ondo dakizue hementxe bertan zegoela Xabier Leteren sortetxea, bere sendiaren baserria. Gustatuko litzaiguke eskultura hau izatea oiartzuar poeta handiarekiko herri honek duen miresmenaren adierazle”, adierazi zuen.
Alkateak Cousillas eta Salaberriari eskerrak eman zizkien, oiartzuarrentzat zein bertako udalarentzat erreferentziala den artistaren obra errealitate bihurtzeko egindako lanagatik. Horrela, Leteren hitzak erabili zituen. “Letek sinesten zuen hauts bihurtuko zela, hartuko zuen lur horretatik landare berriak sortuko zirela, landareetatik zuhaitzak eta zuhaitzetatik loreak, loreetatik fruituak eta fruituetatik gizonak eta abereak bazkatuko zirela. Edan dugu eta edango oraino Xabier Letek utzitako ondaretik. Eta biziko dugu berriz gure oroitzapenetan eta bere abestietan. Eta itzularaziko dugu bere sortetxera, Oiartzungo kulturaren etxera”.
