Denboraldiko partidarik onenean azpiratu dute Añorga
Emakumeen talde nagusiak 4-1 garaitu du orain arte sailkapenean parekatuta egon den Añorga. Sara Radak fitxaketak bi gol egin ditu.
Sara Rada fitxaketak (irudian, eskua belarrian duela) bi gol sartu zituen igandean. Oiartzun Kirol Elkarteko emakumeen talde nagusiak garaipen bikaina lortu zuen atzo eguerdian, Karla Lekuonan, Añorgaren kontra.
Denboraldi osoan daramate hirugarren postuagatik lehian (berdinduta zeuden atzora arte), baina oiartzuarrek ukabilkada ederra eman zieten añorgarrei.
2023-24 denboraldiko partidarik onena jokatu zuten oiartzuarrek, eta 2-0 aurreratu ziren. Atsedenaldiaren bueltan, zalantza txiki batzuk izan arren, beste bi gol sartu zituzten oiartzuarrek, partida lasai bukatzeko. Añorgarrek ohorearen gola lortu zuten.
Nabarmentzekoa izan zen Sara Radaren papera. Reala, Eibar eta Athleticen aritu ondoren, baloiari lehen ostikoak eman zizkion klubera itzuli da. Igandean bi gol sartu zituen (beste biak Ainhoa Lizasok sartu zituen).
Oiartzuarrak hirugarren postuan bakarrik daude. Burgosek —bigarren da sailkapenean— berdindu egin du asteburuan, eta orain puntu bakarrera dute zilarrezko postua. Datorren asteburuan Valladolidera egingo dute txangoa, Parquesolen kontra jokatzeko.
Gizonak, kondenatuta
Gizonen talde nagusiak aurreko asteazkenean jokatu zuen, Deusturen kontra. San Sebastian Egunarekin bat ez egiteko aurreratu zuten partida.
Oiartzunek bi akats egin zituzten norgehiagokaren hasieran, eta horrek zigortu zituen, gol bana jaso baitzuten. Hortik aurrera, ezereza. Oiartzun sailkapeneko bederatzigarren postuan dago.
Emakumeen 3. RFEF Maila
- Oiartzun — Añorga: 4-1.
Gizonezkoen Ohorezko Erregional Maila
- Deustu — Oiartzun: 2-0.
Emakumeen Euskal Liga
- San Ignacio — Oiartzun B: 1-0.
Gizonen Lehen Erregionala
- Oiartzun Bk atseden hartu du.
Emakumeen Ohorezko Erregional Maila
- Beti Gazte — Oiartzun C: 4-2.
Mutilen Gazte Mailako Euskal Liga
- Loyola Indautxu — Oiartzun: 5-2.
Mutilen Gazte Mailako Gorengo Maila
- Usurbil — Oiartzun B: 7-1.
Mutilen Gazte Mailako Lehen Maila
- Oiartzun C — Mariño B: 0-1.
ARETO FUTBOLA
Gizonen Gipuzkoako Lehen Maila
- Oiartzunen ligan ez da partidarik izan asteburuan.
Gizonen Gipuzkoako Bigarren Maila
- Miren Tabernaren ligan ez da norgehiagokarik jokatu asteburuan.
