Pasaiako kirolari onenek saria izango dute aurten ere
Aurtengo Kirol Galarako hautagaitzak aurkeztu daitezke jada, otsailaren 2a izango da horretarako azken eguna. Egunik zehaztu ez badute ere, otsailean izango da sari banaketa.
Pasaiako Udal 2024ko Kirol Gala prestatzen hasi da jada. Hautagaitzak aurkezteko epea zabaldu berri dutela jakinarazi dute, eta egunik zehaztu ez badute ere, otsailean izango dela sari banaketa. “Urtean zehar Pasaian egiteko nabarmena garatu duten edo lurraldeko, Estatuko edo nazioarteko txapelketetan Pasaiaren izena babestu eta postu nabarmena lortu duten kirolariak, klubetako staff teknikoak edo kirol klubak izan litezke sarituak”, azaldu dute udaleko iturriek.
Honako kategoriak izango dira aurten ere: banakako kirolaririk onenaren edo talderik onenaren saria; etorkizuneko kirolariaren, errebelazio kirolariaren edo kirolari beteranoaren saria; eta Joko Garbiaren Saria, berdintasunaren aldeko kirola sustatzearren edo oinarrizko kirola sustatzearren”.
Klubek beren hautagaitza edota beste baten hautagaitza aurkeztu ahal izango dute. Era berean, lubeko edo beste kirol erakunde bateko kirolariak proposatu ahal izango dituzte. Klub bakoitzak gehienez proposamen bat egin ahalko du. Lau barrutietako edozein elkartek edo bizilagunek ere Pasaiako klubetan lehiatzen ez diren kirolari pasaitarren hautagaitzak ahalko dituzte aurkeztu, baldin eta beren kirol emaitzengatik errekonozimendua merezi dutela uste badute.
Hautagaitza aurkeztu ahal izateko klubek egoki inskribatuta egon beharko dute udalerriko Elkarteen Erregistroan edo Eusko Jaurlaritzako Elkarteen Erregistroan.
Otsailaren 4a izango da hautagaitzak aurkezteko azken eguna. Proposamenak helbide honetara bidali beharko dira, otsailaren 4a baino lehen.
Egitasmo honen helburu nagusia “publikoki haien ahalegina, dedikazioa eta eskaintza aitortzea eta kirolaren balio guztiak goraipatzea” dela gogorarazi dute udaleko iturriek.
