1984ko kintoek 40 urteak irailaren 28an ospatuko dituzte
Oarsoaldeko deialdia egin dute iraileko azkeneko larunbaterako. Oraindik gorpuzten ari dira ideia, baina bazkaria eta afari-merienda egitea da asmoa.
Errenteriako zumardiko batzoki zaharraren paretak ikusitako istorioak kontatuko balitu... Jada ez da Oinatiarra taberna gelditzen, ezta ondoko Iturri taberna ere. Gorputza mugitzeak gero eta gehiago kostatzen du, baina horretarako zita jarri dute 1984an jaiotako Oarsoaldeko kintoek.
40 urteak (20 berriak al dira?) elkarrekin ospatzeko data jarri dute: irailaren 28an. Plana oraindik mamitzen ari dira, baina ideia zirriborratu dute: Egiluze sagardotegian bazkaldu (autobusean joanda), dj batek bazkaldu ondorengoak girotu, eta Errenteria-Oreretara bueltatuko dira, bertan festa jarraitu eta afari-merienda bat egiteko aukerarekin.
Izena emateko galdetegi bat prestatu dute George Orwellek bere liburu ezagunenarentzako aukeratu zuten urtean jaiotakoek. Galdetegia betetzeko eskatu dute, joatea berresteko, kontaktu bat emateko, alergiaren baten berri emateko eta afaltzeko aukeraren alde egiteko ala ez.
Biziaren lehen lau hamarkadetara herdoilduta iritsiko denik izango da. Ziur “Since 1992 there is a club which is making history. Seven years later, in 1999, it’s still kicking” entzuten hasten denean min eta pena guztiak joango zaizkiola…
