Udan berreskuratuko dute Gure Zumardia antxotarrek
Topoko obretara bisita egin dute gaur udaleko, Jaurlaritzako, ETSko eta SOS Antxo herri plataformako kideek. Obrak erdira iritsi direla berretsi ahal izan dute.
Lurpeko obretan ere izan dira ordezkariak. Antxoko erdigunea hankaz gora jarri dituzten obrak ekuatorera iritsi dira, tunel bukaeran argia ikusten hasi dira herritarrak. Pasaia Altzarekin eta Galtzarabordarekin lotuko dituen trenbidearen lanak erdira iritsi direla berretsi dute gaur egindako bisitan. Bertan izan dira, besteak beste, Teo Alberro alkatea, Iñaki Arriola Lurralde Plangintza, Etxebizitza eta Garraio sailburua eta Euskal Trenbide Sareko zuzendari nagusi Ernesto Martinez de Cabredo, eta SOS Antxo herri plataformako kide bat.
Bertatik bertara egiaztatu dute topoko obraren garapena. Lehenik eta behin Gure Zumardia plazan izan dira ordezkariak. Bertan berretsi dute ia bukatuta daudela Pasaiako etorkizuneko geltokiko hormak eta egunotan hasi direla geltoki berria izango denaren goiko estalkia egiteko lanekin. Estalki hori egin ondoren, terminalaren beraren hondeaketari ekingo diote lurpean. Prozedura honi esker, Hamarratxeta eta Eskalantegi arteko Zumardiko tartea udarako herritarrei itzultzeko aukera izango dutela ziurtatu du Arriolak, «oinarrizko urbanizazioarekin». Beraz, data zehatzik jarri ez badute ere, badirudi aurtengo sanferminetan herritarrena izan daitekeela Zumardia, ohiko agertokia berreskuratu dezakete ospakizunek.
Molinaoko errekastoan izan dira ordezkariak gero. Galtzarabordako eremuari dagokionez, ainguraketa-lerro bakarra geratzen da eraikitzeko eta ahokadura prest dago jada. Asteotan, tunelaren instalazioak, araztegia, dekantagailuak eta bestelakoak egiten ari dira. Puntu horretako hondeaketa bi hilabete barru hasiko dutela aurreikusi du ETSk eta urtebete inguruz luzatuko dituztela lan horiek, puntu hori etorkizuneko Pasaiako geltokiarekin lotu aurretik.
Eskalantegi kalean aurki daitekeen zulotik barrena jarraitu du gaurko bisitak. Lurpeko tunelean berretsi dutenez, behin Altza eta Galtzaraborda arteko bi kilometroko tartea eraikita dagoenean osaturik geratuko da trenbide bikoitzeko saihesbidea. Gaur egun, lur azpiko galeria horren eta Altzako terminalaren arteko tartea zulatzen ari dira, eta bertara iristeko 130 metro inguru falta dira soilik. Hau martxan jartzen denean, topoak 7,5 minutuko maiztasunak eskainiko dituela hitz eman du Arriolak.
Geltoki berria
Antxoko topoaren geltoki berria Gure Zumardia kalearen ondoko plazaren azpian eraikiko dutela aurreratu dute gaurkoan. Larrialdiko irteera Hamarretxea kalearen inguruan egingo dute. Alboko nasak izango ditu, baina eskailerak atari bakarrera iritsiko dira, eta bertatik aterako dira erabiltzaileak kalera. Lurpeko geltokia martxan jarri ondoren, egungo terminala eraitsiko dute.
Teo Alberro alkatearentzat gaurko bisita «bereziki garrantzizkoa» izan zen, «obra honek eragin nabarmena baitu antxotarren eta pasaitarron egunerokoan. Lanak aurreikusitako epean gauzatzea funtsezkoa da bizilagunek merezi duten etorkizuneko herria diseinatzeko aurrera urratsak egiteko».
HITZA ere gaurko bisitan izan da, eta ondorengo irudiak bildu ditu:
