Lau langabe kontratatu dituzte, Enplegu Planaren bitartez
Oiartzungo Udalak mantenu-lanetarako ofizial bat eta balio anitzeko hiru peoi kontratatu ditu, Oarsoaldea Garapen Agentziarekin elkarlanean.
Joana Mendiburu Oiartzungo alkatea eta Patxi Arrazola, Oarsoaldea Garapen Agentziako Enplegu Sailaren zuzendaria. Oiartzungo Udalak jakinarazi duenez, lau langile kontratatu ditu, Enplegu Planaren bitartez. Mantentze-lanetako ofizial bat eta erabilera anitzeko hiru peoi izango dira langileak. Sei hilabeteko kontratu horien bidez, pertsonen “enplegagarritasuna hobetzea” lortu nahi dela adierazi du udalak.
“Oiartzungo Udalak enplegua eta gizarteratzea sustatzen jarraitzen du, Oarsoaldea Garapen Agentziarekin lankidetzan”, gaineratu dute. Langabeak laneratzeko hainbat proiektu dituzte martxan, batez ere egoera “zailenean” daudenei lehentasuna emanez.
“Kontratazio Publikoko Programek 60 eta 70 kontratazio artean sortzen dituzte udaletan urtero. Gainera, Kontratazio Pribatuko eta Lehen Aukera Programekin Oarsoaldeko enpresetan enplegua sustatzen da”, gaineratu dute. Horiei esker, urtean 40-50 kontratazio egiten dira ohiko lan merkatuan.
Bazterkeria egoeran dauden pertsonentzako programak ere eskaintzen dituztela gogorarazi dute, udaletako gizarte zerbitzuekin elkarlanean.
1.700 artatu
Udalak nabarmendu duenez, enplegua sortzeaz gain, beste gauza hainbat aukera eskaintzen dituzte, oiartzuarren “enplegagarritasuna hobetzeko”.
Zenbakiak eman dituzte. Agentziak urtero 1.700 langabe inguru artatzen ditu, eta lana bilatzeko orientazioa ematen die. Horrez gain, 400 enplegu-eskaintza inguru eta ehun praktika burutzen dira, agentziaren bitartez. Formakuntza programak eta ikastaro trinkoak ere eskaintzen dituzte, besteak beste.
