Otsaila ihoteetara bakarrik mugatuko ez delako
Udalak eta herriko eragileek elikatutako otsaileko agendaren berri eman dute. Askotariko ekitaldiek osatuko dute egitaraua.
'Arnasa betean' filmaren emanaldia izango da otsaileko lehen kultur ekitaldia. Otsaileko lehen asteburuan izango dira ihoteak. Sorginek, intxixuek eta basandereek guztia eklipsatuko dute, baina haien joatearen ondoren izango da bizitzarik.
Herriko eragileek eta udalak elikatutako agendaren berri eman dute. Inauteri giroaz gain, askotarikoak izango dira datorren hilabeteak besapean ekarriko dituenak.
Ohiko antzerki saio, film emanaldi, literatura ekitaldi eta abarrez gain, beste hainbat jarduera nabarmendu daitezke.
Horrela, Delirium Tremensek otsailaren 17an joko du, Zurrounk taldearekin batera. Azaroan jo behar zuten, baina otsailera atzeratzea erabaki zuten.
Korrika urtea da aurtengoa, eta horren harira, Badon “opera postdramatikoa” taularatuko dute. Gainera, estreinatu berri den Bizkarsoro filma ikusteko aukera izango da, ondorengo solasaldiarekin. Tabuen kutxatik oholtzara bertso saio musikatu solidarioa ere egingo dute.
1545 argitaletxeak, bestalde, bi ekitaldi antolatu ditu: Goiatz Labandibarrekin solasaldi bat, eta Jon Martin Etxebesteren Xabier Lete: bertsorik sakonena liburuaren aurkezpena.
