Matrikulazio bileraren egunaren berri eman du Haurtzarok
Matrikulazio kanpaina hastera doa, eta Oiartzungo ikastolak ate irekien egunen berri eman du, baita bilerarena ere.
Ikastetxeak bete-betean murgilduta daude matrikulazio-kanpainan. Haurtzaro Ikastolak jakinarazi duenez, matrikulazioari buruz hitz egiteko bilerak data du, baita ate irekien jardunaldiek ere.
Matrikulazio epea otsailaren 7tik 23ra bitartean izango da. Bilera, berriz, hilaren 31n —asteazkena— izango da, 17:00etan, Urmendi haur eskolan.
Norbaitek aurretik ezagutu nahiko balitu Haurtzaroko instalazioak, ate irekien bi saio antolatu dituzte. Hilaren 26an eta 27an —ostirala eta larunbata— izango dira. Biharkoak 10:30ean eta 15:30ean izango dira, eta etzikoak, 11:00etan.
Aldez aurretik izena eman behar dela jakinarazi dute. Galdetegi bat bete beharko da horretarako, edo 943 491 659 telefono zenbakira deitu. E-posta bidez ere egin daiteke izen emate hori, ikastolako idazkaritzara idatzita.
