Lapurretak prebenitzeko aholkuak eman ditu Udaltzaingoak
Tolarieta etxadian lapurreta izan zen atzo. Egilea identifikatuta dute, eta haren bila ari dira. Susmorik izanez gero, deitzeko eskatu dute.
Tolarieta etxadiko behekalde batean izan zen lapurreta, asteazkenean. Oiartzuar askok jasoko zuten atzo eta gaur mezua: lapurretak egiten ari zirela, ustezko lapurraren bi argazkirekin.
Oiartzungo Udaltzaingoak gertaeren berri eman du. 10:55 inguruan dei bat jaso zuten, pertsona bat kristalezko ate bat bortxaz irekitzen ari zela, Tolarieta etxadiaren inguruan. “Segituan gerturatu ginen, hurbil geundelako, baina ez genuen harrapatzea lortu”, gaineratu du udaltzainburuak. Urrezko erloju bat eraman zuten.
Udaltzainen ustez, autoan zain zegoen laguntzaile bat zuen lapurrak. “Bi aldetatik hurbildu ginen, baina ez genuen harrapatzea lortu, nahiz eta bere janzkeragatik oso detektagarria zen. Horrek pentsarazten digu laguntzaile bat zuela”.
Ertzaintzarekin harremanetan jarri, bizilagunek helarazitako argazkiak erakutsi, eta segituan identifikatu zuten. Urtebete inguru daramate bere atzetik, inguruan antzeko lapurretak egin dituelako: Astigarragan, Hernanin edo Lezon, esaterako.
Kasua argitzeko lanean ari direla zehaztu du Oiartzungo Udaltzaingoak. Horrez gain, duela hilabete baserri inguruan gertatutako lapurreta argitu dutela jakinarazi dute.
Aholkuak
Asteazken goizean erabili zen modus operandia (bihurkin batekin kristalean kolpetxoa jo, zarata gutxirekin hausteko) prebenitzen zaila bada ere, hainbat aholku orokor eman ditu Udaltzaingoak.
Alde batetik, norbait susmagarria ikusten badute auzo edo etxadian, deitzeko. “Normalean, egunero jende bera ibiltzen da etxadietan. Hobe da guri deitzea, eta alarma faltsua izatea, zalantzarekin geratzea baino”, adierazi du udaltzainburuak.
Beste aholkua da etxeko ateari —edo ateei— buelta pare batekin ixtea. “Komeni da beti ixtea, nahiz eta kalera bost minuturako atera”, gaineratu du.
Horrez gain, familia bakarren villetan lorategietako ateekin tentuz ibiltzeko aholkatu du. “Normalean ate nagusien segurtasunean egiten da inbertsio handiena, eta atzeko ateak ahulguneak izan ohi dira. Horiek zaindu behar dira”.
