Munduko ontzi tradizionalen elkargune izango da Pasaia maiatzaren 9tik 12ra
Madrilgo Fitur azokan izan dira gaur ordezkari pasaitarrak, hirugarren ekitaldia aurkezten. Teo Alberro alkateak adierazi duenez, "berdinik gabeko erakusleihoa bat" da jaialdia.
Pasaiako ordezkariak Madrilen. Pasaia Itsas Festibalaren hirugarren edizioa aurkeztu dute gaur Madrilgo (Espainia) Fitur Nazioarteko Turismo Azokan. Bertan izan, besteak beste, Teo Alberro alkatea, Xabier Agote festibaleko zuzendaria, Azahara Dominguez Gipuzkoako Mugikortasun, Turismo eta Lurralde Antolamenduko diputatua eta Aroa Jilete Gonzalez Jaurlaritzako Turismo eta Ostalaritza zuzendaria.
Maiatzaren 9ik 12ra bitartean egingo dute jaialdi handia. Lau egunez, badiako urak munduko hainbat lekutako ontzi tradizionalen elkargune izango dira. Bi gune handitan egingo dute aurtengoa: lehorrean eta itsasoan. Protagonista nagusiak uretan egongo dira, hainbat garai eta tamainako hamarka eta hamarka ontzik hartuko dute badia. Baina lehorrean ere izango da zerekin gozatu, “kultur programa berezia eta kalitatezkoa garatuko” dela aurreratu dute gaur: gastronomia, itsas tailerrak. nazioarteko eta tokiko musika taldeen emanaldiak, dantza, antzerkia… Denetik izango da.
Aurkezpenean nabarmendu nahi izan dutenez, Pasaiako festibala “inguru horretako itsas eta kultur ondare handiaren ospakizuna” da. Pasaia herria bisitatu beharreko herria dela gaineratu dute ordezkariek, “ondo kontserbatutako hirigune historikoak, eskaintza gastronomikoa eta kultura programazio bizia direla eta”. Alkatearentzat Pasaia Itsas Festibala “berdinik gabeko erakusleihoa bat da Pasaiaren kultura eta historia nazioartekoan proiektatzeko eta aitortzeko”.
Aurtengoa iragarriko duen kartela aurkezteko ere probestu dute gaurkoa, Maria Fernandez margolariak egin du. Gouache, pastel eta tinta txinatarra erabili ditu irudia egiteko. Fernandez Montrealen (Kanada) jaioa izan arren, 2005etik Pasai San Pedron bizi da, bertan du Pasaiarte galeria estudioa.
Azkenik, ordezkariek jakinarazi dute Txile izango dela aurtengo edizioaren ohorezko gonbidatua. Laster emango dituzte lankidetza horren gaineko xehetasunak.
